చిన్నారి కిడ్నాప్... సురక్షితంగా కాపాడిన పోలీసులు

చిన్నారికి తినుబండారాలు ఆశచూపి... ఓ వ్యక్తి కిడ్నాప్ చేశాడు. వెంటనే బాలిక తల్లిదండ్రులు పోలీసులకు ఫిర్యాదు చేయగా... గాలింపు చర్యలు చేపట్టారు. నిందితుడిని కనుగొని బాలికను తల్లిదండ్రులకు అప్పగించారు. ఈ ఘటన హయత్​నగర్​ పోలీస్ స్టేషన్​ పరిధిలో చోటు చేసుకుంది.

రంగారెడ్డి జిల్లా హయత్​నగర్​ పోలీస్​స్టేషన్​ పరిధిలోని తట్టిఅన్నారం ఆర్​కే నగర్‌లో ఓ చిన్నారి అదృశ్యమవ్వటం కలకలం రేపింది. కాలనీకి చెందిన ముస్తఫా కుమార్తె ముస్కాన్ సోమవారం మధ్యాహ్నం అదృశ్యమైంది. ఎంత వెతికినా ఆచూకీ లభించకపోవటంతో...చిన్నారి తండ్రి పోలీసులకు ఫిర్యాదు చేశారు.

పోలీసులు ముమ్మర గాలింపు చర్యలు చేపట్టారు . తట్టిఅన్నారంలో ఓ దుకాణం వద్ద సీసీ కెమెరాల్లో చిన్నారితో పాటు స్థానికంగా ఉండే రాజు అనే వ్యక్తి ఉన్నట్లు గుర్తించారు. నిందితుడిని గుర్తించి.. ముస్కాన్‌ను తల్లిదండ్రులకు అప్పగించారు. తెలిసిన వ్యక్తే అయినా... ఎందుకు తీసుకువెళ్లాడనే కోణంలో దర్యాప్తు చేస్తున్నారు.

ఇదీ చూడండి: ట్రాక్టర్ డ్రైవర్ హత్య.. వివాహేతర సంబంధమేనా!