భువనగిరి రైల్వే స్టేషన్లో పార్కింగ్ చేసిన వాహనాల నుంచి పెట్రోల్ దొంగతనం చేస్తున్న వాహన పార్కింగ్ కాంట్రాక్టర్ తమ్ముడు శ్రవణ్ రెడ్డిని పోలీసులు అదుపులోకి తీసుకున్నారు. భువనగిరి రైల్వే స్టేషన్లో పార్కింగ్ చేసిన వాహనాల నుంచి పెట్రోల్ చోరీకి గురి అవుతోంది. శనివారం రాత్రి వాహనాల నుంచి శ్రవణ్ రెడ్డి పెట్రోలు దొంగతనం చేస్తుండగా కానిస్టేబుల్ వీడియో తీశాడు. పెట్రోల్ ఎందుకు తీస్తున్నావు అని కానిస్టేబుల్ ప్రశ్నించారు.
కానిస్టేబుల్ అడిగిన ప్రశ్నకు శ్రవణ్ రెడ్డి దురుసుగా సమాధానం ఇచ్చాడు. పార్కింగ్లో ఉంచిన వాహనాలనుంచి పెట్రోల్ తీసే హక్కు తనకుందని చెప్పుకొచ్చాడు. ' సర్ మీరిక్కడ జాబ్ చేస్తున్నారు. నాకు ఎట్ల పైసల్ వస్తాయి.' అంటూ ఎదురు ప్రశ్నించాడు. నేనే పెట్రోల్ తీస్తున్నా అంటూ బాటిల్ను చూపిస్తూ వీడియో తీసుకోండి అంటూ భయం లేకుండా మాట్లాడాడు.
'అక్కడ ఒక బండి నుంచి తీశా... ఇక్కడో ఒండి నుంచి తీశా పెట్రోల్ తీశా. నాకు ఆ హక్కు ఉంది సర్. నేను కాంట్రాక్ట్ తీసుకున్నా కాబట్టి నాకు ఆ హక్కు ఉంది.' అని శ్రవణ్ రెడ్డి సమాధానమిచ్చాడు. అలా పెట్రోల్ తీసుకొమ్మని మీకు బాండ్ రాసిచ్చారా అని కానిస్టేబుల్ ప్రశ్నిస్తే... కాంట్రాక్ట్కు 12 లక్షలు కట్టు అంటూ దురుసుగా ప్రవర్తించాడు. తాము కాంట్రాక్ట్ వదిలేస్తామని మీరు చూసుకోండి అని అన్నాడు.
'బ్రదర్ మీరు ఓవర్గా రియాక్ట్ అవుతున్నారు. కొత్తగా జాబ్లో ఎక్కినట్లు ఉన్నారు. నువ్వు ఏం చేసుకుంటావో చేస్కో. మీలాంటోళ్లను మస్త్ మందిని చూశా.' అంటూ కానిస్టేబుల్తో శ్రవణ్ రెడ్డి వాగ్వాదానికి దిగాడు. ఈ వీడియో సోషల్ మీడియాలో వైరల్గా మారింది. రైల్వే పోలీసులు, స్టేషన్ మాస్టర్ ఇచ్చిన సమాచారం మేరకు... స్థానిక పోలీసులు నిందితున్ని అదుపులోకి తీసుకున్నారు. వాహన పార్కింగ్ కాంట్రాక్టర్ హేమంత్ రెడ్డి, అతని సోదరుడు శ్రవణ్ రెడ్డిపై కఠిన చర్యలు తీసుకోవాలని ప్రయాణికులు కోరుతున్నారు.
ఇదీ చదవండి: మెడికోతో లవ్ ఫెయిల్.. కక్షతో ల్యాప్టాప్స్ చోరీ.. ప్రతి కాలేజీకి టైమ్టేబుల్ వేసి మరీ...
