ఆర్టీసీ కార్గో పార్సిల్​ ద్వారా మద్యం సరఫరా.. చివరకు చిక్కాడిలా

ఓ వ్యక్తి ఆర్టీసీ కార్గో పార్సిల్ ద్వారా మద్యాన్ని తరలించాలని అనుకున్నాడు. అందుకనుగుణంగా మద్యం సీసాలను పార్సిల్ చేశాడు. కానీ ఇక్కడే ప్లాన్‌ బెడిసికొట్టింది. అందులో నుంచి రెండు సీసాలు కిందపడి పగిలిపోవడంతో ఈ వ్యవహారం బయటపడింది. ఈ ఘటన ఏపీలోని కర్నూలు జిల్లాలో చోటుచేసుకుంది.

ఆంధ్రప్రదేశ్‌లోని కర్నూలు ఆర్టీసీ కార్గో పార్సిల్ కేంద్రంలో మద్యం సీసాలు లభ్యమయ్యాయి. పార్సిల్‌ కేంద్రానికి ఓ బరువైన సంచి వచ్చింది. దాన్ని దింపే క్రమంలో మద్యం వాసన వస్తున్నట్లు హమాలీలు గుర్తించారు. అందులో పగిలిపోయిన రెండు మద్యం సీసాలతో పాటు మరో 10 సీసాలు ఉండటాన్ని చూసి సిబ్బంది అవాక్కయ్యారు. సమాచారం అందుకున్న సెబ్ అధికారులు విచారణ చేపట్టారు.

పార్సిల్ చిరునామాలో ఉన్న పత్తికొండకు చెందిన రవిని అరెస్ట్ చేసి రిమాండ్​కు తరలించారు. అక్రమ మద్యాన్ని ఎప్పటినుంచి ఇలా తీసుకొస్తున్నారు.. ఎవరెవరికి చేరుతుందనే విషయంపై పూర్తిస్థాయి విచారణ చేపడుతున్నట్లు పత్తికొండ సెబ్ అధికారులు తెలిపారు.

ఇవీ చదవండి: ఫేస్​బుక్​లో దోస్తీ.. రూ. కోటికి పైగా కుచ్చుటోపి