ఇండస్ ఇండ్ బ్యాంకును మోసం చేసిన కేసులో కార్వీ స్టాక్ బ్రోకింగ్ లిమిటెడ్ ఛైర్మన్ పార్థసారథిని సీసీఎస్ పోలీసులు ప్రశ్నించారు. రెండు రోజుల కస్టడీలోకి తీసుకున్న పోలీసులు... మొదటి రోజు ఆయన వ్యాపార లావాదేవీల గురించి ప్రశ్నించారు. పెట్టుబడిదారుల షేర్లను బ్యాంకుల్లో ఏ విధంగా తనఖా పెట్టారనే విషయాన్ని అడిగి తెలుసుకున్నారు. అంతేకాకుండా బ్యాంకుల నుంచి తీసుకున్న రుణాన్ని ఎక్కడికి మళ్లించారనే విషయాలను పార్థసారథిని ప్రశ్నించారు.
బ్యాంకులను మోసం చేసిన కేసులో కార్వీ ప్రమోటర్ల పాత్ర ఏ మేరకు ఉందనే విషయాన్ని సీసీఎస్ పోలీసులు ఆరా తీశారు. పార్థసారథి నిధులను పక్కదారి పట్టించినందుకు సీసీఎస్ పోలీసులు... ఎన్ఫోర్స్మెంట్ డైరెక్టరేట్కు లేఖ రాశారు. బ్యాంకుల నుంచి తీసుకున్న రుణాన్ని సొంత ఖాతాకు మళ్లించి... అక్కడి నుంచి పలు సంస్థల్లో పెట్టుబడి పెట్టినట్లు తేల్చిన సీసీఎస్ పోలీసులు.. మనీ ల్యాండరింగ్ జరిగినందుకు దర్యాప్తు చేపట్టాలని ఈడీని కోరారు.
సైబరాబాద్‌లోనూ పార్థసారథిపై కేసు నమోదైంది. ఐసీఐసీఐలో 500కోట్లకు పైగా రుణం తీసుకొని తిరిగి చెల్లించలేదని గచ్చిబౌలిలో కేసు నమోదైంది. ఆ కేసును సైబరాబాద్ ఆర్థిక నేర విభాగానికి బదిలీ చేశారు. ఏపీలోనూ కార్వీ స్టాక్ బ్రోకింగ్ పై కేసు నమోదైంది. 2009లో తన డీమ్యాట్ ఖాతా నుంచి 5 లక్షలకు పైగా నగదు మాయమైందని శ్రీనివాస్ అనే వ్యక్తి... పశ్చిమగోదావరి జిల్లాలోని భీమవరం పోలీసులకు ఫిర్యాదు చేశాడు. భీమవరం పోలీసులు కేసు నమోదు చేసి న్యాయస్థానంలో నేరాభియోగపత్రం దాఖలు చేశారు. పార్థసారథి ఒక్కసారి న్యాయస్థానంలో హాజరు కాకపోవడంతో.... అరెస్ట్ వారెంట్ జారీ చేశారు. హైదరాబాద్ నుంచి పీటీ వారెంట్‌పై పార్థసారథిని భీమవరం తీసుకెళ్లే యోచనలో పోలీసులు ఉన్నారు.
ఇదీ చదవండి: ఒక్కొక్కటిగా బయటపడుతున్న కార్వీ స్టాక్‌బ్రోకింగ్ సంస్థ మోసాలు
