నిషేధిత మిరప విత్తనాలు, గడ్డి మందును పెద్దపల్లి టాస్క్ఫోర్స్ పోలీసులు స్వాధీనం చేసుకున్నారు. రంగాపూర్ గ్రామ శివారులో తనిఖీలు చేపట్టిన పోలీసులు రూ.13.77 లక్షల విలువైన నకిలీ విత్తనాలు, పురుగుల మందులను సీజ్ చేశారు. ఆరుగురు నిందితులను అదుపులోకి తీసుకుని విచారించగా అంతరాష్ట్ర ముఠా గుట్టు ఛేదించామని రామగుండం సీపీ సత్యనారాయణ తెలిపారు.
భూపాలపల్లి జిల్లా మల్హర్‌రావు మండలం దానంపల్లికి చెందిన శ్రీనివాస ఎరువుల దుకాణం యజమాని శ్రీనివాస్... రాష్ట్ర ప్రభుత్వం నిషేధించిన యూఎస్-341 రకం మిర్చి విత్తనాలతోపాటు నిషేధిత గడ్డి మందులు విక్రయిస్తున్నట్లు విచారణలో తేలిందని సీపీ తెలిపారు. నిందితుడు ఇచ్చిన సమాచారం మేరకు హైదరాబాద్లోని సదరు కంపెనీపై దాడులు నిర్వహించి పత్రాలను సీజ్ చేసినట్లు తెలిపారు.
నకిలీ విత్తనాలు, నిషేధిత పురుగుల మందులను విక్రయిస్తు... రైతులను మోసం చేస్తే ఎంతటివారినైనా ఉపేక్షించేది లేదని సీపీ సత్యనారాయణ ఘాటుగా హెచ్చరించారు. అలాంటివారిపై పీడీ యాక్టు కేసులు సైతం పెడుతున్నామని తెలిపారు . ఈ ఘటనలో తొగరి శ్రీనివాస్, రవీందర్ రెడ్డి, హర్ష, రామకృష్ణ, వెంకట్ రెడ్డి, నాగేంద్రబాబును అదుపులోకి తీసుకున్నట్లు వెల్లడించారు.
ఇదీ చదవండి: SCHOOLS OPEN: పొంచి ఉన్న కరోనా మూడో దశ ముప్పు.. విద్యాసంస్థల రీఓపెన్ అవసరమా ?
