ఓవైపు కాలుతున్న శవాలు.. మరోవైపు సమాధులు... మధ్యలో ఓ పసికందు. గొంతు చించుకుని ఏడుస్తూ ఉంది. అది విన్న స్థానికులు... దగ్గరికి వెళ్లి చూశారు. అయ్యే అప్పుడే పుట్టిన ఆ పసికందును చూసి తల్లడిల్లిపోయారు. ఎవరైనా ఉన్నారా అని వెతికారు. చుట్టు పక్కల చూసినా... లాభం లేకపోయింది. గుక్కపెట్టి ఏడుస్తున్న ఆ బాబును ఓడిలోకి తీసుకున్నారు. ఎవరో గుర్తుతెలియని వ్యక్తులు.. శ్మశానవాటికలో వదిలేసినట్లు భావించారు. ఇక పోలీసులకు సమాచారం అందించారు.
బతికి ఉండగానే పసికందును శ్మశానవాటికలో వదిలేసిన ఈ ఘటన వరంగల్ నగరంలో వెలుగుచూసింది. అప్పుడే పుట్టిన పసికందును గుర్తుతెలియని వ్యక్తులు... శ్మశానవాటికలో వదిలివెళ్లారు. చిన్నారి పసికందు అరుపులు విన్న స్థానికులు.. వెంటనే పోలీసులకు సమాచారం అందించారు. పసికందును స్థానికుల సహాయంతో.. పారిశుద్ధ్య సిబ్బంది హుటాహుటిన ఎంజీఎంకు తరలించారు. వైద్యులు ఆ పసికందుకు చికిత్స అందజేశారు. నగరంలోని ఓ ప్రైవేటు ఆసుపత్రిలో పసికందు జన్మించినట్లు వైద్యులు గుర్తించారు. ప్రస్తుతం బాబు పరిస్థితి నిలకడగానే ఉన్నట్లు వైద్యులు తెలిపారు. నవమోసాలు మోసి జన్మనిచ్చిన అనంతరం ఇలా పడేయడం బాధాకరమని స్థానికులు ఆవేదన వ్యక్తం చేశారు. చిన్నపిల్లలు భారంగా భావిస్తే తల్లిదండ్రులు ఛైల్డ్లైన్ సంప్రదించాలని కోరారు.
ఇవీ చూడండి:
