సులువుగా డబ్బు సంపాదించేందుకు బైక్ చోరీలకు పాల్పడుతున్న ఓ యువకున్ని హైదరాబాద్లోని నల్లకుంట పోలీసులు అరెస్ట్ చేశారు. అతని వద్ద నుంచి 6 ద్విచక్రవాహనాలను స్వాధీనం చేసుకున్నారు. నిందితుడిపై కేసు నమాదు చేసి రిమాండ్కు తరలించారు.
మహబూబాబాద్ జిల్లా డోర్నకల్ మండల కేంద్రానికి చెందిన నల్లబోలు ముఖేశ్(24) ఓ ప్రైవేటు రవాణా సంస్థలో డ్రైవర్గా పనిచేస్తూ.. హైదరాబాద్లోని సైదాబాద్ పూసల బస్తీలో నివాసం ఉంటున్నాడు. జల్సాలకు అలవాటు పడిన అతడు సులభంగా డబ్బు సంపాదించేందుకు ద్విచక్ర వాహనాల దొంగతనాలకు పాల్పడుతున్నాడు.
నగరంలోని అంబుజా కాలనీలో పోలీసులు వాహన తనిఖీలు చేస్తున్న క్రమంలో చోరీ చేసిన బైకుతో ముఖేశ్ వారికి చిక్కాడు. పత్రాలను చూపించమని అడగ్గా పొంతన లేని సమాధానాలు చెబుతుండడంతో అనుమానం వచ్చి అతన్ని అదుపులోకి తీసుకున్నారు. దర్యాప్తులో తాను 6 బైక్లను చోరీ చేశానని అతడు ఒప్పుకున్నాడని నల్లకుంట ఎస్సై తెలిపారు. 2017లో ఇదే తరహా నేరాలకు పాల్పడ్డ ముఖేశ్ జైలు శిక్ష కూడా అనుభవించాడని పేర్కొన్నాారు. నిందితుడి వద్ద నుంచి 6 బైక్లను స్వాధీనం చేసుకుని రిమాండ్కు తరలించామని చెప్పారు.
ఇదీ చదవండి: ' పాఠశాలల కొనసాగింపుపై సభలోనే ప్రకటిస్తా'
