Brain stroke: కాళ్లపారాణి ఆరకముందే ఓ నవ వధువుకు నూరేళ్లు నిండాయి. కొత్త జీవితాన్ని ప్రారంభించిన ఆమె కలలు కొద్ది రోజుల్లోనే కనుమరుగయ్యాయి. ప్రేమ వివాహం చేసుకున్న ఆ యువతి పట్ల అంతలోనే విధి వక్రీకరించింది. మెట్టినింట్లో అడుగు పెట్టానన్న సంతోషం లేకుండా శాశ్వతంగా లోకాన్ని విడిచి వెళ్లిపోయేలా చేసింది. తీవ్రమైన గుండెపోటుకు గురైన యువతి బ్రెయిన్‌స్ట్రోక్తో తనువు చాలించింది. ఈ విషాద ఘటన హైదరాబాద్లో జరిగింది.
మెదక్‌ పట్టణంలోని ఎన్జీవో కాలనీకి చెందిన రాఘవేంద్రకు పార్వతీపురానికి చెందిన ఉష(23) రెండేళ్లుగా ప్రేమించుకుని ఈ నెల 11న హైదరాబాద్లో వివాహం చేసుకున్నారు. కొంగొత్త ఆశలతో, ప్రేమించిన వాడినే మనువాడానన్న సంతోషంతో నవ వధువు అత్తారింట్లో అడుగుపెట్టింది. అత్తవారి కుటుంబ సభ్యులతో ఆనందంగా ఉన్న సమయంలో శుక్రవారం ఆమెకు తలనొప్పి రావడంతో స్థానికంగా ఓ ప్రైవేటు వైద్యుడికి చూపించారు. అతడి సూచన మేరకు హైదరాబాద్‌లోని ఓ ప్రైవేటు ఆసుపత్రికి తరలించారు. శనివారం సాయంత్రం మూర్ఛ రాగా, ఒక్కసారి తీవ్రమైన గుండెపోటు వచ్చి బ్రెయిన్‌స్ట్రోక్తో మరణించింది.
ఇవీ చూడండి: కేరళను తాకిన నైరుతి రుతుపవనాలు.. రాష్ట్రంలో నేడు, రేపు వర్షాలు
