సంగారెడ్డి జిల్లా పటాన్చెరు మండలం భానూరు గ్రామానికి చెందిన వెంకటేశం గత లాక్డౌన్ సమయంలో ఉపాధి కోల్పోయాడు. దీనికితోడు అతని గుండె, మూత్రపిండాలు దెబ్బతినటంతో ఆస్పత్రిలో చేరి మూడు లక్షలు ఖర్చు చేశాడు. ఓ పక్క ఉపాధి పోయి, మరోపక్క అప్పులపాలయ్యాడు. ఎలాగైనా డబ్బు సంపాదించాలని నిర్ణయించుకున్నాడు. ఇదే సమయంలో బాచుపల్లికి చెందిన డీఆర్డీవో శాస్త్రవేత్త హనుమంతరావు 497 సర్వేనెంబర్లో 20 గుంటల భూమిని అమ్మాలకున్నారు. ఈ విషయం తెలుసుకున్నవెంకటేశం బ్రోకర్ ద్వారా ఆ భూమి పత్రాలు తీసుకున్నాడు.
గత మార్చిలో యాదాద్రి భువనగిరి జిల్లా చౌటుప్పల్కు చెందిన తన బంధువు గుర్రం పాండు వద్దకు వెళ్లి, పింఛన్ ఇప్పిస్తానని ఆధార్ కార్డు ఇవ్వాలన్నాడు. పాండు, అతని ఆధార్ కార్డు తీసుకుని నల్గొండ జిల్లా చండూరులోని ఓ ఇంటర్నెట్ సెంటర్కి వెళ్లి ఆధార్లో ఉన్న పాండు పేరును హనుమంతరావుగా మార్పించాడు. అనంతరం కూకట్పల్లి వచ్చి ధరణి పోర్టల్లో పాస్ పుస్తకం కోసం ఆధార్తో దరఖాస్తు చేశాడు. అదే సమయంలో శాస్త్రవేత్త హనుమంతరావు చనిపోవటంతో ఆయన భార్య కనకదుర్గ కూడా భూ మార్పిడి కోసం దరఖాస్తు చేసుకున్నారు. గుర్తించిన రెవెన్యూ అధికారులు పోలీసులకు ఫిర్యాదు చేయటంతో అసలు విషయం తెలిసింది. నిందితుడు వెంకటేశంను అరెస్ట్ చేసి రిమాండ్కు పంపారు.
ఇదీ చదవండి: లేడీ డాక్టర్ పేరుతో లవ్ ప్రపోజల్.. 24 లక్షలు ఖల్లాస్
