A case on the owner of brick kiln: పని చేయించుకుని జీతాలివ్వకుండా వేధింపులకు గురిచేస్తున్నఇటుక బట్టీ యజమానిపై కేసు నమోదు చేసి ఒడిశా కార్మికులకు విముక్తి కలిగించినట్టు మెదక్ జిల్లా సీఐడీ అడిషనల్ ఎస్పీ వెంకటేశ్వర్లు తెలిపారు. ఇటుక బట్టీల నిర్వహకుడు తుమ్మ లక్ష్మీనారాయణ కార్మికులను ఇబ్బందులకు గురిచేస్తున్న విషయాన్ని ఒడిశా నుంచి వారి సంబంధీకులు ట్విట్టర్ ద్వారా తెలంగాణా సీఐడీ అడిషనల్ డీజీపీ మహేష్ భగవత్ దృష్టికి తీసుకెళ్లారని చెప్పారు.
మంగళవారం సాయంత్రం మెదక్ రూరల్ పోలీస్ స్టేషన్లో ఏర్పాటు చేసిన మీడియా సమావేశంలో ఆయన వివరాలు వెల్లడించారు. మెదక్ మండలం మాచవరం పరిధిలో ఇటుక బట్టీలు నిర్వహిస్తున్న మెదక్ పట్టణానికి చెందిన తుమ్మ లక్ష్మీనారాయణ ఒడిశా నుంచి కార్మికులను తీసుకువచ్చి వారితో పనిచేయించుకుంటూ వేతనాలు ఇవ్వకుండా ఇబ్బంది పెడుతున్నాడన్నారు. అంతేగాక వారిని కుటుంబ సభ్యులతో కూడా మాట్లాడనివ్వడం లేదన్నారు.
ఆయన ఆదేశాల మేరకు మంగళవారం తాము, లేబర్ డిపార్ట్మెంట్, చైల్డ్ వెల్ఫేర్ ఆఫీసర్లతో కలిసి మాచవరం సమీపంలోని ఇటుక బట్టీల వద్దకు చేరుకుని బాధిత కార్మికులను విచారించినట్టు తెలిపారు. సదరు ఇటుక బట్టీల నిర్వహకుడు వారితో పని చేయించుకుని జీతాలు ఇవ్వకుండా ఇబ్బందులకు గురి చేస్తుండటంతోపాటు, మానసికంగా వేధిస్తున్నట్టు నిర్దారణ అయ్యిందన్నారు.
ఈ మేరకు బాధితులైన ఒడిశా కార్మికులు గల్వాల్ రాణా, సురేంద్రి రాణా, ముకుంద రాణా, నిరు బదాయి, సుదమ్ రాణా, ప్రకాశ్ రాణాలకు విముక్తి కల్పించి, ప్రజ్వల స్వచ్చంద సంస్థ సహకారంతో వారిని సురక్షితంగా వారి ఒరిస్సాలోని స్వగ్రామాలకు తరలించినట్టు ఏఎస్పీ తెలిపారు. ఇటుక బట్టీల నిర్వాహకుడు లక్ష్మీనారాయణ మీద మెదక్ రూరల్ పోలీస్ స్టేషన్ లో వివిధ సెక్షన్ల కింద కేసు నమోదు చేసినట్టు ఆయన పేర్కొన్నారు.
ఈరోజు అడిషనల్ డీజీపీ మహేశ్ భగవత్ ఆదేశాల మేరకు లేబర్ డిపార్ట్మెంట్, చైల్డ్ వెల్ఫేర్ ఆఫీసర్లతో కలిసి మాచవరం సమీపంలోని ఇటుక బట్టీల వద్దకు చేరుకుని బాధిత కార్మికులను విచారించాము. సదరు ఇటుక బట్టీల నిర్వాహకుడు లక్ష్మీనారాయణ వారితో పని చేయించుకుని జీతాలు ఇవ్వకుండా ఇబ్బందులకు గురి చేస్తుండటంతో పాటు, మానసికంగా వేధిస్తున్నట్టు నిర్దారణ అయ్యింది. ఈ మేరకు బాధితులైన ఒరిస్సా కార్మికులకు విముక్తి కల్పించి లక్ష్మీనారాయణ మీద వివిధ సెక్షన్ల కింద కేసు నమోదు చేశాము. - జి.వెంకటేశ్వర్లు, సీఐడీ అడిషనల్ ఎస్పీ
ఇవీ చదవండి:
