ఓ వైపు మైసూర్ గ్యాంగ్రేప్ ఘటన దర్యాప్తు కొనసాగుతుండగానే కర్ణాటకలో మరో దారుణం వెలుగులోకి వచ్చింది. బెళగావిలో 15ఏళ్ల బాలికపై సామూహిక అత్యాచారానికి పాల్పడ్డారు దుండగులు. ఈ వ్యవహారంలో కేసు నమోదు చేసిన 10 గంటల్లోనే నిందితులను అరెస్టు చేశారు పోలీసులు.
ఏం జరిగిందంటే?
ఘటప్రభ పోలీసు స్టేషన్ పరిధిలోని గోకక్ తాలుకాలో ఈ ఘటన జరిగింది. వ్యవసాయ క్షేత్రానికి ఒంటరిగా వెళుతున్న బాలికను ఆమె గ్రామానికే చెందిన నలుగురు వ్యక్తులు వెంబడించారు. అనంతరం నిర్మానుష్య ప్రాంతానికి తీసుకెళ్లి అత్యాచారం చేశారు. ఈ ఘటన గురించి ఎవరికైనా చెబితే బాలికను చంపేస్తామని బెదిరించారు దుండుగులు. ఆ తర్వాత అక్కడి నుంచి పారిపోయారు. అనంతరం ఆ బాలిక ఆసుపత్రిలో చేరింది.
ఘటప్రభ పోలీసులకు బాధితురాలి కుటుంబసభ్యులు గురువారం ఫిర్యాదు చేయడం వల్ల ఈ ఘటన వెలుగులోకి వచ్చింది. బాలిక కోలుకున్న అనంతరం వారు ఠాణాకు వచ్చారు. వారి ఫిర్యాదు మేరకు పోక్సో చట్టం కింద పోలీసులు కేసు నమోదు చేశారు. ప్రత్యేక బృందాలుగా ఏర్పడిన పోలీసులు.. నిందితుల కోసం ముమ్మరంగా గాలించారు. ఈ క్రమంలో 10 గంటల్లోనే వారిని అరెస్టు చేశారు.
ఇదీ చూడండి: SUSPICIOUS DEATH: పెళ్లి బరాత్లో యువకుడి మృతి.. అసలేం జరిగింది?
