యదాద్రి జిల్లా వ్యాప్తంగా ఇప్పటి వరకు 40 మంది వ్యాపారస్థులపై పోలీసులు కేసులు నమోదు చేశారు. నిబంధనలు ఉల్లంఘించిన కారణంగా మరో 72 మందికి నోటీసులు అందజేశారు. అనవసరంగా రోడ్లపై తిరుగుతోన్న 300 మందిపై కేసు నమోదు చేశారు. 8 ఆటోలు, 8 కార్లు సీజ్ చేశారు. వాట్సాప్లో వదంతులు పోస్ట్ చేసి.. ఇతరులకు పంపినందుకు ఇద్దరిపై కేసు నమోదు చేసినట్లు డీసీపీ నారాయణ రెడ్డి తెలిపారు.
కంచెలు వేయొద్దు..
జిల్లాలోని కొన్ని గ్రామాల సరిహద్దుల్లో ముళ్ల కంచె వేసి దిగ్బంధం చేశారు. సంఘటనపై ఇప్పటికే ప్రజాప్రతినిధులకు, గ్రామ ప్రజలకు కౌన్సిలింగ్ ఇచ్చినట్లు డీసీపీ పేర్కొన్నారు. రాత్రి వేళల్లో కర్ఫ్యూ పకడ్భందీగా అమలవుతుంది. పోలీసులు లాఠీలకు పని చెప్పేసరికి ప్రజలు బయటికి రావడానికి భయపడుతున్నారు. చౌటుప్పల్ మండలం పతంగి టోల్ ప్లాజా ఖాళీగా దర్శనం ఇస్తోంది.
కాలినడకను ఖమ్మంకు..
హైదరాబాద్ నుంచి ఖమ్మంకు కాలినడకన వస్తున్న యువతి తారసపడగా పోలీసులు ఆమె వివరాలు తెలుసుకున్నారు. రవాణ సౌకర్యం లేనందున ఖమ్మం జిల్లాకు తన తల్లి, ఇద్దరు తమ్ముళ్లతో కాలి నడకన ఖమ్మం బయలుదేరినట్లు ఆమె తెలిపంది. వారంతా సొంతూరికి చేరేలా పోలీసులు చర్యలు తీసుకున్నారు.
సోడియం హైపో క్లోరైడ్ పిచికారి..
మరోవైపు వైరస్ వ్యాప్తిని అడ్డుకునేందుకు పారిశుద్ధ్య సిబ్బంది ఫైరింజన్ ద్వారా సోడియం హైపో క్లోరైడ్ స్ప్రే చేస్తున్నారు. రాష్ట్ర అగ్ని మాపక శాఖ ఆదేశాల మేరకు డివిజన్ పరిధిలోని యాదాద్రి భువనగిరి జిల్లా , జనగామ జిల్లాలో డిస్ ఇన్ఫెక్షన్ సొల్యూషన్ని పిచికారి చేస్తున్నట్లు జిల్లా అగ్నిమాపక అధికారి జయకృష్ణ తెలిపారు.
ఇవీ చూడండి: దత్తత తీసుకున్నారు.. హోటల్లోనే చిక్కుకుపోయారు!
