హుజూరాబాద్లో సమస్యలపై పోరాటం చేసేందుకే 28 ఏళ్ల యువకుడు, ఎన్ఎస్యూఐ రాష్ట్ర అధ్యక్షుడు బల్మూరి వెంకట్ను బరిలో దింపినట్లు పీసీసీ అధ్యక్షుడు రేవంత్రెడ్డి వెల్లడించారు. హుజూరాబాద్ ఉపఎన్నికలో కాంగ్రెస్ అభ్యర్థి బల్మూరి వెంకట్ నామినేషన్ వేశారు. ఎన్నికల నిర్వహణ కమిటీ ఛైర్మన్, పార్టీ సీనియర్ నేత పొన్నం ప్రభాకర్తో కలిసి (huzurabad bypoll nominations)నామపత్రాలు సమర్పించారు. ఈ సందర్భంగా ఏర్పాటుచేసిన రోడ్షోలో రేవంత్ పాల్గొన్నారు. నాడు దివంగత రాజశేఖర్రెడ్డి.. నాటి ఎన్ఎస్యూఐ రాష్ట్ర అధ్యక్షుడు పొన్నం ప్రభాకర్ను బరిలో నిలిపితే.. కరీంనగర్ ప్రజలు ఆశీర్వదించారని గుర్తుచేశారు. అలానే నేడు కాంగ్రెస్ నేతలంతా కలిసి... నేటి ఎన్ఎస్యూఐ రాష్ట్ర అధ్యక్షుడు బల్మూరి వెంకట్ను బరిలో నిలుపుతున్నామని.. ప్రజలు అండగా ఉండాలని విజ్ఞప్తి చేశారు. వెంకట్ ఎంపిక ఓ చారిత్రాత్మక నిర్ణయంగా రేవంత్ అభివర్ణించారు.
నాడు పొన్నం గెలిచి.. తెలంగాణ తీసుకొచ్చారన్న రేవంత్రెడ్డి(tpcc chief revanth reddy).. నేడు వెంకట్ను గెలిపిస్తే.. నిరుద్యోగులకు ఉద్యోగాలు వచ్చేలా పోరాటం చేస్తారని.. కేసీఆర్కు పక్కలో బళ్లెం లెక్క తయారవుతారని రేవంత్రెడ్డి చెప్పారు. ఈ సందర్భంగా కాంగ్రెస్ నుంచి తెరాసలో చేరిన కౌశిక్రెడ్డిపైనా పరోక్షంగా విమర్శలు చేసిన రేవంత్.. ఉత్తమ్ కుమార్రెడ్డి ఎంతో ప్రాధాన్యత ఇచ్చినా.. పార్టీని, నేతలను మోసం చేసేందుకు యత్నించారని మండిపడ్డారు.
మూటలు, ముఠాలో తిరుగుతున్నారు..!
చాలా మంది ఈ ప్రాంతంలో అనుకోవచ్చు.. మూటలు, ముఠాలతో తెరాస, భాజపా నేతలు ఐదు నెలలుగా తిరుగుతున్నా.. కాంగ్రెస్ మాత్రం అభ్యర్థిని ఆలస్యంగా ప్రకటించిందని.. కానీ తమది ప్రజాసమస్యలపైనే పోరాటం రేవంత్ స్పష్టం చేశారు.
వారు గెలిస్తే మహా అయితే..
గతంలో జరిగిన ఉపఎన్నికలు, జీహెచ్ఎంసీ ఎన్నికల్లో తెరాస, భాజపా అభ్యర్థులను గెలిపించారని.. ఈ ఒక్కసారికి కాంగ్రెస్కు అవకాశం ఇవ్వాలని రేవంత్ విజ్ఞప్తి చేశారు. హుజూరాబాద్లో తెరాస, భాజపాలు గెలిస్తే... వారికే లాభం చేకూరుతుందన్న రేవంత్.. అదే కాంగ్రెస్ విజయం సాధిస్తే.. ప్రభుత్వ ఉద్యోగాల భర్తీ కోసం బల్మూరి వెంకట్ కొట్లాడుతారని... పీసీసీ అధ్యక్షుడు రేవంత్ స్పష్టం చేశారు. తెరాస గెలిస్తే మహా అయితే పింఛను మరో రెండు వేలు పెరుగుతుందని... అదే కాంగ్రెస్ అభ్యర్థి వెంకట్ గెలిస్తే.. 40 నుంచి 50 వేల రూపాయలతో నిరుద్యోగులకు ఉద్యోగాలు వస్తాయన్నారు.
వారేమైనా ప్రజల కోసం కొట్లాడుతున్నారా..?
ఈ సందర్భంగా కేసీఆర్, ఈటలపైనా ఆరోపణలు చేసిన రేవంత్.. వారేమైనా ప్రజల కోసం కొట్లాడుతున్నారా.. అంటూ ప్రశ్నించారు. ఒకప్పటి మిత్రులు హరీశ్, ఈటల నేడు ఒకరిపై మరొకరు ఆరోపణలు చేసుకుంటున్నారని.. చెప్పిన రేవంత్ వారిద్దరినీ తోడు దొంగలుగా అభివర్ణించారు.
తనకు అవకాశం ఇవ్వాలని.. హుజూరాబాద్ (huzurabad congress candidate) కాంగ్రెస్ అభ్యర్థి బల్మూరి వెంకట్ ప్రజలకు విజ్ఞప్తి చేశారు. తెలంగాణ ఉద్యమంలో ఎన్నోసార్లు జైలుకు వెళ్లినట్లు చెప్పిన వెంకట్.. విద్యార్థులు, నిరుద్యోగుల సమస్యలు తనకు తెలుసని.. ఒక్కసారి అవకాశం ఇస్తే.. ప్రజలు, విద్యార్థులు, నిరుద్యోగుల సమస్యలపై కొట్లాడుతానని స్పష్టం చేశారు.
ఇదీచూడండి: Huzurabad By Election 2021: హుజూరాబాద్లో తెరాస, కాంగ్రెస్ అభ్యర్థుల నామినేషన్
