వేర్హౌస్ మార్కెట్లో హైదరాబాద్కి ప్రత్యేక స్థానముంది. ఇతర దక్షిణాది రాష్ట్రాల కంటే ఇక్కడ స్థలాల కొరత లేకపోవడం, ధరలు అందుబాటులో ఉండటం, అద్దెలు తక్కువగా ఉండటం, ట్రావెల్ కనెక్టివిటీ మెరుగ్గా ఉండటం లాభిస్తోంది. దీనికితోడు తెలంగాణ ప్రభుత్వ రాయితీలు, ప్రోత్సాహకాలు వంటివి కంపెనీలను, పెట్టుబడిదారులను ఆకర్షిస్తున్నాయి.
అమెజాన్, ఫ్లిప్కార్ట్ వంటి సంస్థల వేర్హౌస్లు ఇక్కడే...
ఫ్లిప్కార్ట్, అమెజాన్ లాంటి ఈ-కామర్స్ కంపెనీలతోపాటు ఐకియా వంటి స్టోర్స్ కూడా నగరం సరిహద్దుల్లో గిడ్డంగులను ఏర్పాటు చేసుకున్నాయి. తాజాగా ఇబ్రహీంపట్నంలోని మంగలపల్లిలో హెచ్ఎండీఏ, ఆన్కాన్ గ్రూపు సంయుక్తంగా రాష్ట్రంలోనే అతిపెద్ద ఇంటిగ్రేటెడ్ వేర్హౌస్ను ప్రారంభించాయి. త్వరలో హైదరాబాద్ సహా ఇతర నగరాల్లో వచ్చే ఐదేళ్లలో 2 మిలియన్ చదరపు అడుగుల గిడ్డంగులను నిర్మించనున్నట్లు ప్రభుత్వం ప్రకటించింది.
ఓఆర్ఆర్తో ఎన్నో సానుకూలతలు..
ఇప్పటికే ఫార్మా, బయోటెక్నాలజీ కంపెనీలకు హైదరాబాద్ హబ్గా మారింది. వీటితోపాటు ఈ-కామర్స్ రంగాలు ప్రవేశించడంతో సిటీలో వేర్హౌస్ మార్కెట్కు డిమాండ్ పెరిగింది. రకరకాల రవాణా మధ్యమాలు బాహ్యవలయ రహదారికి అనుసంధానం కావటం వల్ల.. త్వరలో ఔటర్ చుట్టూ మరో 8 వేర్హౌస్లు రానున్నాయని మంత్రి కేటీఆర్ పేర్కొన్నారు. తయారీ, రిటైల్ రంగాలకు గిడ్డంగుల డిమాండ్ ఎక్కువగా ఉండటం వల్ల ఇక్కడ వేర్హౌస్ మార్కెట్ రోజురోజుకీ విస్తరిస్తోందని కేటీఆర్ అన్నారు.
పారిశ్రామిక రంగ హోదా వల్లే...
అమెజాన్.. తన దక్షిణాది మార్కెట్కు సరిపోయే రెండు లాజిస్టిక్ సెంటర్లను హైదరాబాద్ శివార్లలోనే ఏర్పాటు చేసుకుంది. అలాగే ఫ్లిప్కార్ట్ లాంటి సంస్థలు తమ వేర్హౌస్లను ఇక్కడే ఏర్పాటు చేసుకునేందుకు మొగ్గుచూపుతున్నాయి. వేర్హౌస్, లాజిస్టిక్ రంగాలకు మౌలిక, పారిశ్రామిక రంగ హోదా ఇవ్వడం వల్ల ఈ సెక్టార్కు డిమాండ్ పెరిగిందనుకోవచ్చు.
రియల్ ఎస్టేట్లో రెసిడెన్షియల్, కమర్షియల్ మార్కెట్లతోపాటు వేర్హౌజ్ మార్కెట్లో హైదరాబాద్ ముందుండటం శుభ పరిణామం.
ఇదీ చదవండిః లాజిస్టిక్స్ పార్కును ప్రారంభించిన మంత్రి కేటీఆర్
