పురపాలక, నగరపాలక ఎన్నికల్లో అభ్యర్థుల ఖరారు, బీ ఫారాల పంపిణీపై తెరాస ఎమ్మెల్యేలకు.. ఆ పార్టీ అధినేత, ముఖ్యమంత్రి కేసీఆర్ రేపు దిశానిర్దేశం చేయనున్నారు. ఉదయం పది గంటలకు తెలంగాణ భవన్లో జరగనున్న సమావేశానికి అభ్యర్థులకు ఇవ్వాల్సిన బీ ఫారాలను.. ఎమ్మెల్యేలు, నియోజకవర్గ ఇంఛార్జీలకు రేపు అందజేయనున్నారు.
ఎమ్మెల్యేలు, పార్టీ ఇంఛార్జీలకు ఏ ఫారాలను తెరాస ప్రధాన కార్యాదర్శి శ్రీనివాసరెడ్డి అందజేయనున్నారు. ఎమ్మెల్యేలు తమ నియోజకవర్గాలకు వెళ్లి... ఎంపిక చేసిన కౌన్సిలర్, కార్పొరేటర్ అభ్యర్థులకు బీ ఫారాలు పంపిణీ చేస్తారు. ఏ ఫారం, బీ ఫారాలకు సంబంధించిన విధి విధానాలను కేసీఆర్ వివరించనున్నారు.
అభ్యర్థుల ఖరారులో తీసుకోవాల్సిన జాగ్రత్తలతో పాటు... పోటీ తీవ్రంగా ఉన్నందున... టికెట్ దక్కని వారు అసంతృప్తికి గురి కాకుండా చూడాల్సిన బాధ్యత ఎమ్మెల్యేలు, నియోజకవర్గ ఇంఛార్జ్లకు దిశానిర్దేశం చేయనున్నారు. పోలింగ్, ఓట్ల లెక్కింపుతో పాటు... మేయర్, ఛైర్మన్ ఎన్నిక పూర్తయ్యే వరకూ వ్యవహరించాల్సిన తీరును పార్టీ శ్రేణులకు కేసీఆర్ వివరిస్తారు.
