రైతులకు, వ్యాపారులకు మధ్య సౌకర్యం కల్పించటానికే పరిమితమైన గుంటూరు మిర్చి యార్డు ..వ్యాపార ధోరణి వైపు ఆలోచిస్తోంది. మార్కెట్లో కారంపొడికి ఉన్న గిరాకీకి తగ్గట్టు దేశవ్యాప్తంగా నాణ్యమైన సరకు రవాణా చేయాలని యార్డు నిర్వాహకులు నిర్ణయించారు. దీనివల్ల రైతులు పండించిన పంటకు మంచి ధర వచ్చే అవకాశాలుంటాయని ఛైర్మన్ తెలిపారు. రైలు మార్గాల ద్వారా ఎక్కువ మొత్తంలో రవాణా చేయవచ్చని... ఛార్జీలు కూడా తగ్గుతాయని పాలకవర్గ సమావేశంలో చర్చించారు.
పొగాకు రీసెర్చ్ సెంటర్ (సీటీఆర్ఐ) కు సంబంధించి అరవై ఎకరాల భూమి ఉందని.. వ్యవసాయశాఖను సంప్రదించి దానిని తీసుకోవాలని యోచిస్తున్నట్లు యార్డు చైర్మన్ చెప్పారు. ఇందుకోసం సీటీఆర్ఐ చైర్మన్ను సంప్రదించినట్లు తెలిపారు. ఆ ప్రాంతంలో పూలు, పండ్లు, కూరగాయల మార్కెట్ను ఏర్పాటు చేసేందుకు ప్రయత్నిస్తున్నామని వెల్లడించారు. హైదరాబాద్లోని గడ్డి అన్నారం, ముంబయిలో వంటి వ్యవసాయ మార్కెట్లలాగా అభివృద్ధి చేయాలనుకుంటున్నట్లు పేర్కొన్నారు.
ఇదీ చదవండి: 'ఏపీలో నివసించే నిర్మాతలకే స్టూడియో భూములను కేటాయించాలి'
