తిరుపతి ఉపఎన్నికల ప్రచారం రాజీనామాల రంగు పులుముకొంది. మరి కొద్దిరోజుల్లో ప్రచార గడువు ముగుస్తుండగా.. రెండు ప్రధాన పార్టీలు విమర్శల దాడి పెంచాయి. ప్రత్యేకహోదా అంశాన్ని ప్రజల్లోకి బలంగా తీసుకెళ్లేందుకు తెలుగుదేశం దూకుడుగా వెళ్తోంది. ఆ పార్టీ అధినేత చంద్రబాబు మూడు రోజులుగా ప్రత్యేక హోదా అంశంపై వైకాపాను ఇరుకున పెట్టేలా ప్రకటనలు చేశారు. కేంద్రం మెడలు వంచి హోదా సాధిస్తామన్న వైకాపా ఆ అంశాన్ని గాలికొదిలేసిందని ఆరోపించారు.
హోదా కోసం తమ ఎంపీల రాజీనామాకు సిద్ధమన్న ఆయన....మీరు సిద్ధమా అంటూ అధికార పార్టీకి సవాల్‌ విసిరారు. రెండ్రోజుల పాటు స్పందించని వైకాపా... హోదా సంగతి ప్రస్తావించకుండా సరికొత్త సవాల్‌ విసిరింది. ఉప ఎన్నికల్లో వైకాపా గెలవకపోతే 22 మంది ఎంపీలు రాజీనామా చేస్తారని...మీరు ఓడితే మీ ఎంపీలు రాజీనామా చేయగలరా అంటూ మంత్రి పెద్దిరెడ్డి సవాల్‌ చేశారు.
హోదాపై చిత్త శుద్ధి ఉంటే రాజీనామాను సిద్ధపడాలి: ఎంపీ రామ్మోహన్ నాయుడు
హోదా కోసం ఎంపీలు రాజీనామాకి సిద్ధపడాలన్న తమ సవాల్‌ను స్వీకరించకపోగా సరికొత్త సవాల్‌ విసరడం ద్వారా వైకాపా ఉప ఎన్నికలపై తన భయాన్ని బయటపెట్టుకొందని తెలుగుదేశం ఆరోపించింది. ఏపీ ప్రయోజనాలు, హోదాపై వైకాపాకు ఏ మాత్రం చిత్తశుద్ధి ఉన్నా ఎంపీలంతా రాజీనామాకు సిద్ధపడాలని ఆ పార్టీ ఎంపీ రామ్మోహన్‌నాయుడు సవాల్‌ విసిరారు.
సవాళ్లు, ప్రతి సవాళ్లతో రెండు ప్రధాన పార్టీలు ఓటర్లను ఆకట్టుకొనే ప్రయత్నం చేస్తుండగా ఇదంతా డ్రామా అంటూ వామపక్ష నేతలు విమర్శిస్తున్నారు. ఆర్భాటపు ప్రకటనలతో ప్రజలను వైకాపా, తెదేపా తప్పుదోవ పట్టిస్తున్నాయని మండిపడుతున్నారు. ఎన్నికల ప్రచారంలో నేతల ప్రకటనలను ఆసక్తిగా గమనిస్తున్న ప్రజలు...ఓటింగ్‌ రోజు ఎవరి వైపు మొగ్గుచూపుతారోనన్న అంశం ఇప్పుడు ఆసక్తిగా మారింది.
ఇవీచూడండి: కేటీఆర్‌ సార్‌ మీరు సినిమాల్లో ట్రై చేయలేదా?
