కరోనా బ్యాచ్​ అయినా.. ఇంటర్​లో సత్తా చాటారు..

Inter Results: రెండేళ్ల పాటు కరోనా ఆగం చేసినా... ఇంటర్‌ పరీక్షల్లో ఉత్తీర్ణత మళ్లీ సాధారణ స్థితికి చేరింది. మెుదటి సంవత్సరంలో 63.32 శాతం, సెంకడియర్‌లో 67.16 శాతం ఉత్తీర్ణత నమోదైంది. ప్రైవేటు కళాశాలలకు ధీటుగా... గురుకుల విద్యాసంస్థల్లో ఎక్కువ మంది పాసయ్యారు. కేజీబీవీ, మోడల్‌ స్కూళ్లలోనూ మంచి ఫలితాలు వచ్చాయి. మరోవైపు పలుచోట్ల ఫెయిల్‌ అయిన విద్యార్థులు మనస్తాపంతో ఆత్మహత్యకు పాల్పడ్డారు. విద్యార్థులెవరూ బలిదానాలు చేసుకోవద్దని మంత్రి సబితా ఇంద్రారెడ్డి సూచించారు.

Inter Results: ఇంటర్మీడియట్ ఫలితాల్లో గురుకుల విద్యార్థులు సత్తా చాటారు. ప్రైవేటు కళాశాలల కన్నా గురుకుల విద్యాసంస్థల్లో ఎక్కువ ఉత్తీర్ణత శాతం లభించింది. మొదటి సంవత్సరంలో గురుకులాలు, కేజీబీవీలు, మోడల్ స్కూళ్లలో 73.30 శాతం మంది విద్యార్థులు పాసయ్యారు. రెండో సంవత్సరంలో ప్రైవేటు కళాశాలల్లో 68.30శాతం మంది ఉత్తీర్ణులు కాగా... గురుకులాల్లో 78.25 శాతం నమోదైంది. ఎస్సీ గురుకులాల్లో 88.03శాతం మొదటి సంవత్సరం విద్యార్థులు పాసయ్యారు. 41 శాతం ఎస్సీ గురుకులాల్లో వందశాతం ఫలితాలు వచ్చాయి.

బీసీ గురుకులాల్లో మొదటి సంవత్సరం 86.14శాతం, సెంకడియర్‌లో 93.84శాతం ఉత్తీర్ణత నమోదైంది. వందకుపైగా విద్యార్థులు 950 మార్కులు సాధించారు. రాష్ట్రంలోని 172 కస్తూర్బా గాంధీ బాలికల విద్యాలయాల్లో సెంకడియర్‌లో 86.64 శాతం మంది ఉత్తీర్ణులయ్యారు. నిర్మల్‌ జిల్లా సోఫీనగర్‌లోని బాలికల గురుకుల జూనియర్ కళాశాలలో మెుదటి సంవత్సరం చదువుతున్న ధనుష్క... రాష్ట్రస్థాయి ర్యాంకు సాధించింది. 470 మార్కులకుగాను 468 మార్కులు సంపాదించింది.