సచివాలయం కూల్చివేతపై మంత్రివర్గ తీర్మానం ఎక్కడ..: హైకోర్టు

సచివాలయం కూల్చివేత పనులపై హైకోర్టు స్టేను ఈనెల 15 వరకు పొడిగించింది. సచివాలయం భవనాలు కూల్చివేయాలని జూన్ 30న రాష్ట్రమంత్రివర్గం తుది నిర్ణయం తీసుకుందని ప్రభుత్వం హైకోర్టుకు నివేదించింది. నిబంధనలు పాటించకుండా కూల్చివేతలు చేపట్టారన్న ఆరోపణల్లో నిజం లేదని.. అన్ని అనుమతులు, జాగ్రత్తలు తీసుకున్న తర్వాతే కూల్చివేత పనులు ప్రారంభించినట్లు ప్రభుత్వం వివరించింది. వాదనలు విన్న ధర్మాసనం కేబినెట్ నిర్ణయాన్ని సీల్డ్ కవర్​లో సమర్పించాలని ఆదేశించింది.

నిబంధనలు పాటించకుండా సచివాలయ భవనాలు కూల్చివేస్తున్నారన్న ఆరోపణల్లో ఏ మాత్రం నిజం లేదని హైకోర్టుకు ప్రభుత్వం నివేదించింది. అన్ని అనుమతులు, జాగ్రత్తలు తీసుకున్న తర్వాతే కూల్చివేత పనులు ప్రారంభించినట్లు తెలిపింది.

ప్రభుత్వం కౌంటర్​ దాఖలు..

సచివాలయం కూల్చివేత పనులు నిలిపివేయాలంటూ ప్రొఫెసర్ పీ.ఎల్​. విశ్వేశ్వరరావు, చెరుకు సుధాకర్ దాఖలు చేసిన ప్రజాప్రయోజన వ్యాజ్యంపై ప్రధాన న్యాయమూర్తి జస్టిస్ ఆర్​ఎస్ చౌహాన్, జస్టిస్ విజయ్​సేన్ రెడ్డి ధర్మాసనం సోమవారం మరోసారి విచారణ చేపట్టింది. వ్యాజ్యంలోని ఆరోపణలు తోసిపుచ్చుతూ రాష్ట్ర ప్రభుత్వ తరఫున ప్రధాన కార్యదర్శి సోమేశ్​కుమార్ కౌంటర్ దాఖలు చేశారు.

కోర్టుల జోక్యం వద్దు

ప్రస్తుత భవనాలను కూల్చి.. అక్కడే అద్భుతమైన సమీకృత సచివాలయం నిర్మించాలని గత నెల 30న మంత్రివర్గం తీర్మానం చేసిందని ప్రభుత్వం వెల్లడించింది. అందుకు అనుగుణంగా ప్రభుత్వం, జీహెచ్ఎంసీ అనుమతులు పొందిన తర్వాతే ఆర్ అండ్ బీ అధికారులు కూల్చివేత పనులు చేపట్టారని వివరించింది. కూల్చివేత వల్ల చుట్టుపక్కల ప్రజలకు స్వచ్ఛమైన గాలి అందడం లేదని, వాయు కాలుష్యం తలెత్తుతోందన్న వాదనలు పూర్తి నిరాధారమని పేర్కొంది. కూల్చివేత వల్ల తమకు ఇబ్బంది కలుగుతోందని ఒక్కరు కూడా ఫిర్యాదు చేయలేదని తెలిపింది. పిటిషనర్లు రాజకీయ పార్టీలకు చెందిన వారని.. రాజకీయ ప్రయోజనాల కోసం దాఖలు చేసిన ప్రజా ప్రయోజన వ్యాజ్యాన్ని ప్రోత్సహించవద్దని హైకోర్టును కోరింది. నూతన సచివాలయం నిర్మించాలన్నది ప్రభుత్వ విధానపరమైన నిర్ణయమని.. కోర్టులు జోక్యం చేసుకోవద్దని కోరింది.

కాన్ఫిడెన్షియల్ అనుకుంటే..

సచివాలయం కూల్చివేతపై ఇంకా తుది నిర్ణయం తీసుకోలేదని గతంలో ప్రభుత్వం పేర్కొందని.. దాని ఆధారంగానే తీర్పు వెల్లడించినట్లు హైకోర్టు పేర్కొంది. తుది నిర్ణయం తీసుకుంటే తమకు వివరాలు సమర్పించాలని.. లేకుంటే విచారణ ఎలా చేపడతామని హైకోర్టు పేర్కొంది. కేబినెట్​ నిర్ణయంపై ఏ మీడియాలోనూ వార్తలు రాలేదని.. ప్రెస్​నోట్ కూడా ఇవ్వలేదని ధర్మాసనం వ్యాఖ్యానించింది. ఒకవేళ కాన్ఫిడెన్షియల్ అనుకుంటే కనీసం న్యాయ మూర్తులకయినా ఇవ్వకుంటే కేసులు ఎలా విచారణ జరుపుతామని హైకోర్టు పేర్కొంది. గతంలోనూ కేబినెట్​ నిర్ణయం తమ ముందుంచారని తెలిపింది.

అడ్వకేట్ జనరల్ బీఎస్ ప్రసాద్ జోక్యం చేసుకుంటూ హైకోర్టుకు ఇవ్వడానికి తమకెలాంటి అభ్యంతరం లేదని తెలిపారు. సాయంత్రంలోగా వివరాలను సమర్పిస్తామన్నారు. సీల్డ్ కవర్లో మంత్రివర్గ తీర్మానం సమర్పించాలని హైకోర్టు ఆదేశించింది. ప్రభుత్వ కౌంటర్​పై అభ్యంతరాలు ఉంటే రేపటిలోగా వివరణ ఇవ్వాలని పిటిషనర్ తరఫు న్యాయవాదిని ఆదేశించింది.

తదుపరి విచారణను ఈనెల 15కు వాయిదా వేసిన హైకోర్టు.. అప్పటి వరకు కూల్చివేతలు చేపట్టవద్దంటూ స్టే పొడిగించింది.

ఇవీచూడండి: సచివాలయం కూల్చివేతపై ఈ నెల 15వరకు స్టే పొడిగింపు