Discom losses in telangana: విద్యుత్ శాఖ ఆర్థిక స్థితిగతులపై విద్యుత్ శాఖ మంత్రి జగదీశ్ రెడ్డి, ఆర్థిక శాఖ మంత్రి హరీశ్ రావు.. మింట్ కాంపౌండ్లోని విద్యుత్ సౌధలో వరసగా మూడోరోజు సమీక్ష చేశారు. దిగువ, మధ్యతరగతి ప్రజలకు ఊరట కల్గిస్తున్న సంస్థలను ఆదుకునేందుకుగాను సీఎం కేసీఆర్ ప్రతి సంవత్సరం రూ.1,253 కోట్లతో కలిపి రూ.10,000 కోట్లు సబ్సిడీ రూపంలో అందిస్తున్నా విద్యుత్ పంపిణీ సంస్థలకు నష్టాలు తప్పడంలేదని అధికారులు వివరించారు. దేశంలోని ఇతర రాష్ట్రాలతో పోల్చి చూసినప్పుడు దిగువ మధ్యతరగతి గృహ వినియోగదారులకు 50 యూనిట్లలోపు విద్యుత్ను వినియోగించుకుంటున్న వారి నుంచి రాష్ట్రంలో కేవలం రూ.1.45 వసూలు చేస్తుండగా.. గుజరాత్లో రూ.3.30, ఉత్తరప్రదేశ్లో మూడు రూపాయలు, పంజాబ్లో రూ.3.49, అత్యధికంగా పశ్చిమబంగాలో రూ.4.02 వసూలు చేస్తున్న అంశాన్ని ప్రధానంగా ప్రస్తావించారు.
వ్యత్యాస భారం మొత్తం ప్రభుత్వంపై..
power charges in telangana: 100 యూనిట్ల విద్యుత్ను వినియోగించుకునే వినియోగదారుల సరాసరి బిల్లు తెలంగాణలో 239 రూపాయలుగా ఉంటే కాంగ్రెస్ పాలిత రాష్ట్రం రాజస్థాన్లో రూ.861, భాజపా పాలిత కర్ణాటకలో రూ.702, పశ్చిమ బంగాలో రూ.759, మహారాష్ట్రలో రూ.677, గుజరాత్లో రూ.601, కేరళలో రూ.476, పంజాబ్లో రూ.473, ఉత్తరప్రదేశ్లో రూ.457 వసూలు చేస్తున్నట్లు అధికారులు తెలిపారు. తెలంగాణలో 200 యూనిట్లు వినియోగిస్తున్న ఒక్కో వినియోగదారు నుంచి రూ.822 వసూలు చేస్తున్నట్లు తెలిపారు. మహారాష్ట్రలో అదే 200 లోపు యూనిట్లు వినియోగించుకుంటున్న వినియోగదారుల నుంచి అత్యధికంగా రూ.1,689, రాజస్థాన్లో రూ.1,666, పశ్చిమబంగాలో రూ.1,630, కర్ణాటకలో రూ.1,556, మధ్యప్రదేశ్లో రూ.1,427, గుజరాత్లో రూ.1,285, కేరళలో రూ.1,224 వసూలు చేస్తున్నట్లు తెలిపారు. తెలంగాణ డిస్కంలు ఒక్కో యూనిట్ సరఫరా వ్యయం రూ.7.24 అవుతుండగా.. 50 యూనిట్లలోపు వినియోగదారులకు రూ.1.45, 100 యూనిట్ల వరకు రూ.2.60, 200 యూనిట్లకు రూ.4.30 మాత్రమే గృహ వినియోగదారుల నుంచి వసూలు చేస్తున్నామన్నారు. సరఫరా వ్యయానికి గృహ వినియోగదారులు చెల్లించే మొత్తాలలో ఉన్న వ్యత్యాసాన్ని ప్రభుత్వం భరిస్తుందన్నారు.
నాణ్యమైన విద్యుత్ను ఉచితంగా..
వ్యవసాయ వినియోగదారులకు 24 గంటలు ఉచిత నాణ్యమైన నిరంతర విద్యుత్ను అందిస్తున్నామని అధికారులు తెలిపారు. గుజరాత్లో వ్యవసాయ బిల్లులు వసూలు చేస్తూన్నా.. విద్యుత్ సరఫరా చేస్తున్నది కేవలం 9 గంటలే అన్నారు. అందుకు ఒక్కో మోటారు కనెక్షన్ నుంచి నెలకు రూ.667 వసూలు చేస్తుండగా, అదే 9 గంటలు సరఫరా చేస్తున్న ఉత్తరప్రదేశ్లో నెలకు రూ.2,408, కేరళలో రూ.2,952, పశ్చిమబంగాలో రూ.4,558, మహారాష్ట్రలో నెలకు రూ.1,609, ఏడు గంటలు మాత్రమే విద్యుత్ అందిస్తోన్న రాజస్థాన్లో రూ.1,800 వసూలు చేస్తున్నారన్నారు. పరిశ్రమల రంగానికి తమిళనాడు, కర్ణాటక, ఉత్తరప్రదేశ్, మధ్యప్రదేశ్, రాజస్థాన్, పంజాబ్, మహారాష్ట్ర, దిల్లీ, పశ్చిమబంగాతో పోల్చి చూసినప్పుడు తెలంగాణ డిస్కంలు తక్కువ ధరలకే నాణ్యమైన విద్యుత్ నందిస్తున్న విషయంపై కూడా సమీక్షలో ప్రధానంగా చర్చించారు.
ఇదీ చూడండి:
