Nizam college: నిజాం కళాశాలలో మూసివేసిన లైబ్రరీని తెరవాలంటూ విద్యార్థులు గ్రంథాలయ గేటు ముందు బైఠాయించి ఆందోళనకు దిగారు. ప్రిన్సిపల్కు వ్యతిరేకంగా నినాదాలు చేశారు.
మూసివేసిన లైబ్రరీని వెంటనే తెరవాలని విద్యార్థులు డిమాండ్ చేశారు. పరీక్షలు జరుగుతున్నాయని కుంటిసాకుతో గ్రంథాలయాన్ని గత పది రోజులుగా మూసి ఉంచడంపై మండిపడ్డారు. తమ జీవితాలతో చెలగాటం ఆడుతున్న... ప్రిన్సిపల్ను వెంటనే తొలగించాలని కోరారు.
ఘటన స్థలానికి చేరుకున్న అబిడ్స్ పోలీసులు... ప్రిన్సిపల్తో మాట్లాడతామని నచ్చజెప్పే ప్రయత్నం చేశారు. ప్రిన్సిపల్ బయటకు వచ్చి తమకు స్పష్టమైన హామీ ఇచ్చేంతవరకు ఆందోళన విరమించేదే లేదని విద్యార్థులు భీష్మించుకుని కూర్చున్నారు.
ఈ క్రమంలో విద్యార్థులు, పోలీసులకు మధ్య వాగ్వాదం, తోపులాట జరగడంతో కొద్దిసేపు స్వల్ప ఉద్రిక్తత పరిస్థితి నెలకొంది. దాంతో పోలీసులు భారీగా కళాశాలలో మోహరించారు. చివరకు పోలీసులు నచ్చజెప్పడంతో.. వారు ఆందోళన విరమించారు.
ఇదీ చదవండి:Telangana IT Budget 2022-23 : ఐటీలో 80వేల కొత్త ఉద్యోగాల కల్పనకు ప్రణాళిక
