రైతే రాజుగా.. తెలంగాణ అడుగులు

రాష్ట్ర ప్రభుత్వం చేపడుతోన్న విప్లవాత్మక పథకాలతో వ్యవసాయానికి మంచి రోజులు వస్తున్నాయి. వ్యవసాయ రంగ సంక్షోభం, రైతు ఆత్మహత్యల పరంపర నుంచి గట్టెక్కేందుకు చేపడుతున్న కార్యక్రమాలతో... పంటల సాగు పెరుగుతోంది. తెలంగాణ ఆవిర్భావం తర్వాత ఈ ఆరేళ్లకాలంలో ప్రభుత్వం తీసుకుంటున్న చర్యలు రైతులకు వెన్నుదన్నుగా నిలుస్తున్నాయి.

ప్రత్యేక రాష్ట్రం ఆవిర్భావం తర్వాత వ్యవసాయం కొత్త పుంతలు తొక్కుతోంది. రాష్ట్ర ప్రభుత్వ చేపడుతోన్న రైతు సంక్షేమ కార్యక్రమాలతో పంటల సాగు రోజురోజుకు పెరుగుతోంది. వ్యవసాయ రంగంలో సంక్షోభంతో రైతు ఆత్మహత్యల నుంచి బయటపడేందుకు అనేక విప్లవాత్మక పథకాలు ప్రవేశపెట్టింది. ఉచిత విద్యుత్, సాగునీరు, ఖరీఫ్, పెట్టుబడి సాయం అందిస్తోంది. తెలంగాణ రాష్ట్రం ఏర్పడిన తర్వాత వ్యవసాయ రంగానికి అధిక నిధుల కేటాయింపుతో ఆహార ధాన్యాల దిగుబడులు రికార్డు స్థాయిలో వస్తున్నాయి. గత యాసంగి సీజన్​లో ఏకంగా కోటి 4 లక్షల టన్నుల ధాన్యం దిగుబడి వచ్చింది.

రైతుబంధు, బీమా..

రైతుకు పెట్టుబడి సాయం అందించేందుకు ఎకరానికి ఏటా 10 వేల రూపాయలు నేరుగా రైతుల బ్యాంకు ఖాతాల్లో జమ చేసే రైతుబంధు పథకం దేశంలో తొలిసారిగా తెలంగాణ ప్రభుత్వం అమలు చేస్తోంది. ఈ ఏడాది దీనికోసం రూ. 14 వేల కోట్లు కేటాయించింది. వరదలు, వడగండ్లు, ఇతర ప్రకృతి వైపరిత్యాలతో... 18 నుం 59 ఏళ్ల లోపు రైతు మరణిస్తే... బాధిత కుటుంబానికి తక్షణం రూ.5 లక్షలు అందించేందుకు రైతుబంధు బీమా పథకం అమలు చేస్తోంది. పిడుగుపాటుతో మరణిస్తే రూ. 6 లక్షల చొప్పున ఆర్థిక సాయం అందిస్తోంది. తొలి విడత 2014లో రుణ మాఫీ పథకానికి రూ.16,500 కోట్లు, మలి విడత కోసం ఈ ఏడాది రూ. 9 వేల కోట్ల కేటాయించింది.

ప్రతి గ్రామీణ నియోజకవర్గానికి ఒకటి చొప్పున 100 సంచార పశువైద్యశాలలు ఏర్పాటు చేసి... వైద్య సేవలు అందిస్తోంది. తక్కువ నీటితో ఎక్కువ దిగుబడి సాధించేందుకు సూక్ష్మ సేద్యాన్ని ప్రోత్సహిస్తూ రాయితీలు ఇస్తోంది. రాష్ట్రం ఏర్పడే నాటికి కేవలం 4.17 లక్షల మెట్రిక్ టన్నుల సామర్థ్యం కలిగిన 176 గోదాములు మాత్రమే ఉండేవి. కొత్తగా 18.30 లక్షల మెట్రిక్ టన్నుల సామర్థ్యం కలిగిన 364 గోదాములు నిర్మించింది. కొత్తగా మరో 40 లక్షల మెట్రిక్ టన్నుల సామర్థ్యం కలిగిన గోదాములు నిర్మించాలని తాజాగా ప్రభుత్వం నిర్ణయించింది.

మార్కెట్​ పదవులకు రిజర్వేషన్​

నల్గొండ జిల్లా గంధంవారిగూడెం దగ్గర రూ.1.50 కోట్లతో బత్తాయి మార్కెట్‌, నకిరేకల్‌లో రూ.3.07 కోట్లతో నిమ్మకాయల మార్కెట్, పీఏ పల్లి మండలం కొనమేకలవారిగూడెం వద్ద దొండ మార్కెట్‌ ఏర్పాటు చేసింది. మామిడి మార్కెట్‌ కొల్లాపూర్‌లో నిర్మించేందుకు ప్రభుత్వం చర్యలు తీసుకుంటోంది. దేశంలో మరెక్కడా లేని విధంగా తెలంగాణలో వ్యవసాయ మార్కెట్ కమిటీ పదవులు రిజర్వేషన్‌ ద్వారా భర్తీ చేసింది. 25 మంది ఎస్సీలు, 10 మంది ఎస్టీలు, 50 మంది బీసీలు, 60 మంది వరకు మహిళా రైతులు... వ్యవసాయ మార్కెట్ కమిటీ ఛైర్మన్లు అయ్యారు.

ఇదీ చూడండి: కార్పొరేట్​కు దీటుగా దూసుకెళ్తున్న గురుకులాలు