ఏపీలో ఎన్నికల విధులు నిర్వహిస్తున్న అధికారులను బెదిరిస్తూ ఎంత పెద్దవారు ప్రకటన చేసినా లెక్క చేయాల్సిన పనిలేదని ఎస్ఈసీ నిమ్మగడ్డ రమేశ్ కుమార్ స్పష్టం చేశారు. ఉద్యోగులు, అధికారులను అస్థిరపరిచేలా చేసే ప్రయత్నాలను ఎట్టిపరిస్థితుల్లోనూ ఉపేక్షించబోమని ఎస్ఈసీ తేల్చి చెప్పారు. అధికారులను బ్లాక్ లిస్టులో పెడతామంటూ మంత్రి పెద్దిరెడ్డి చేసిన వ్యాఖ్యలకు ప్రతిగా ఎస్ఈసీ ఓ ప్రకటన జారీ చేశారు.
అభద్రతా భావన అవసరం లేదు..
పంచాయతీ ఎన్నికల విధి నిర్వహణలో ఉన్న అధికారులు, కీలక బాధ్యతలు వహిస్తున్న రిటర్నింగ్ అధికారులకు ఎలాంటి అభద్రతా భావన అవసరం లేదని నిమ్మగడ్డ రమేశ్ తన ప్రకటనలో పేర్కొన్నారు. ఎన్నికల నియమావళికి అనుగుణంగా చట్టప్రకారం బాధ్యతలు నిర్వహించే అధికారులకు రాజ్యాంగం పూర్తి రక్షణ కల్పిస్తుందని స్పష్టం చేశారు. ఎన్నికల విధుల్లో ఉన్న అధికారులు ఎన్నికల కమిషన్ రక్షణ కవచంలో ఉంటారని.. వారిపై ఎలాంటి క్రమశిక్షణా చర్యలు చేపట్టాలన్నా ఎస్ఈసీ ముందస్తు అనుమతి తప్పనిసరిగా తీసుకోవాలని పేర్కొన్నారు. దీనిపై సుప్రీంకోర్టు నుంచి స్పష్టమైన మార్గదర్శకాలు ఉన్నాయని తెలిపారు. ఎన్నికల విధుల్లో ఉన్న అధికారులపై ముందస్తు అనుమతి లేకుండా చర్యలను నిషేధిస్తూ త్వరలో ఎస్ఈసీ ఉత్తర్వులు జారీ చేస్తుందని స్పష్టం చేశారు.
చట్టరీత్యా చెల్లవు..
అధికారులు, ఉద్యోగులు ఇలాంటి ప్రకటనలపై భయభ్రాంతులకు లోనుకావాల్సిన అవసరం లేదని నిమ్మగడ్డ అన్నారు. అలాంటి ప్రయత్నాలు చట్టరీత్యా చెల్లవన్నారు. ప్రభుత్వ ఉద్యోగులను, అధికారులను భయభ్రాంతులకు గురిచేసే ప్రయత్నాలు అనైతికమని రాష్ట్ర ఎన్నికల కమిషన్ దృఢంగా విశ్వసిస్తోందని అందులో పేర్కొన్నారు. ఎన్నికల విధుల్లో ఉన్న ఉద్యోగులను అస్థిరపరిచే చర్యలను ఏ మాత్రం ఉపేక్షించబోమని తేల్చి చెప్పాపు. వ్యక్తులు ఎవరైనా తాత్కాలికమేనని, వ్యవస్థలే శాశ్వతమని నిమ్మగడ్డ ప్రకటన ద్వారా హితవు పలికారు.
ఇదీ చదవండి: ఎమ్మెల్యే గంటా రాజీనామా.. ఉక్కు పరిశ్రమ కోసం ఉద్యమం
