ఖరీఫ్ సీజన్ ప్రారంభం కావడమే ఆలస్యం.. అప్పుడే నకిలీ విత్తనాలు వ్యాపారం ఊపందుకుంది. గ్రామాల్లో నకిలీ విత్తనాల వ్యాపారులు ఆ విత్తనాలు అమ్మడానికి రంగం సిద్ధంచేశారు. ‘కలుపు మొక్కలను చంపే గ్లైఫోసెట్‌ మందులను తట్టుకుని బతికే’(హెచ్‌టీ), జన్యుమార్పిడి(జీఎం) పత్తి విత్తనాల అమ్మకం, సాగును కేంద్రం దేశంలోకి అనుమతించలేదు. ప్రస్తుతం వీటిని సాధారణ బీటీ పత్తి విత్తనాలంటూ వ్యాపారులు అమ్మేస్తున్నారు. ఇతర పంటల నాసిరకం విత్తనాలనూ అమ్ముతున్నారు.
నకిలీలలు ఎన్నెన్నో
బీటీ పత్తి విత్తనాలను 450 గ్రాముల చొప్పున ఒక్కో ప్యాకెట్‌లో ప్యాక్‌ చేసి, దానిపై తయారీ కంపెనీ వివరాలన్నీ ముద్రించాలి. కానీ బస్తాల్లో నింపి రైతులకు కిలోల చొప్పున విడిగా అమ్ముతున్నారు. తాజాగా మహబూబాబాద్‌లో 33 బస్తాల్లో విడి పత్తి గింజలు, అక్రమంగా ప్యాక్‌ చేసినవి పట్టుబడ్డాయి. గత మార్చి నుంచి రాష్ట్రంలో పోలీసులు ఇలా విక్రయిస్తున్న 10 వేల క్వింటాళ్లకు పైగా విత్తనాలను సీజ్‌ చేశారు. మొత్తం 42 మందిని అరెస్టు చేసి కేసులు పెట్టారు. పక్కనున్న ఏపీ, మహారాష్ట్ర, కర్ణాటక రాష్ట్రాల నుంచి నాసిరకం, హెచ్‌టీ విత్తనాలు పెద్దఎత్తున బస్తాల్లో తెస్తున్నారు.
ఇతర రాష్ట్రాల నుంచి
సరిహద్దుల్లో ఉన్న మంచిర్యాల జిల్లాలోనే ఇప్పటికే 9,479 క్వింటాళ్ల లూజు విత్తనాలను పట్టుకున్నారంటే ఇతర రాష్ట్రాల నుంచి ఏ స్థాయిలో వస్తున్నాయో అవగతమవుతోంది. హైదరాబాద్‌ను ఆనుకుని ఉన్న మేడ్చల్‌ జిల్లాలోనూ అక్రమ హెచ్‌టీ విత్తనాలను స్వాధీనం చేసుకున్నారు. నకిలీవి అమ్మేవారిపై పీడీచట్టం కింద కేసులు పెట్టాలని సీఎం కేసీఆర్‌ ఆదేశాలివ్వడం వల్ల పోలీసు, వ్యవసాయశాఖల అధికారులతో రాష్ట్రస్థాయి టాస్క్‌ఫోర్స్‌ బృందాలను ఏర్పాటు చేశారు.
భిన్నంగా కంపెనీలు
రాష్ట్రంలో విత్తన పత్తి పంట ఎక్కువగా గద్వాల జిల్లాలో సాగు చేశారు. ఈ పంటలో నాసిరకం విత్తనాలను ప్రైవేటు కంపెనీలు తిరిగి వాటిని పండించిన రైతులకే వెనక్కి ఇచ్చేశాయి. ఆ విత్తనాలను మళ్లీ మార్కెట్లో అమ్మకుండా మధ్యలోకి విరిచేయాలి. అందుకు భిన్నంగా కంపెనీలు నేరుగా విత్తనాలనే ఇవ్వడం వల్ల కొందరు వ్యాపారులు వాటిని కొని.. మేలైనవని చెప్పి మళ్లీ మార్కెట్లో అమ్ముతున్నారు. తాజాగా హైదరాబాద్‌లో ఓ ప్రైవేటు విత్తన కంపెనీపై జరిగిన దాడుల్లో పట్టుబడినవి గద్వాల నుంచి తెచ్చిన నాసిరకం అని తేలింది.
ఇదీ చూడండి : నేడు 'అమరవీరులకు కాంగ్రెస్ సలాం' కార్యక్రమం
