భారీ వర్షాలు, అధికారుల నిర్లక్ష్యంతో నగర రోడ్లపై చెత్తకుప్పలు పేరుకుపోయాయి. వీటిని తొలగించకపోవడంతో దోమలు వృద్ధి చెంది కాలనీలపై దండెత్తుతున్నాయి. వేలాది మంది వ్యాధుల బారినపడి ప్రభుత్వ, ప్రైవేటు ఆస్పత్రులకు పరుగులు పెడుతున్నారు. ఒకవైపు డయేరియా, మలేరియా మరోవైపు చికున్‌గన్యాతో మంచానపడుతున్నారు. ఈ సంఖ్య రోజు రోజుకు పెరుగుతుండటం ఆందోళన కలిగిస్తోంది. ఇంత జరుగుతున్నా కూడా బల్దియా అధికారులు పారిశుద్ధ్యం మెరుగుపై తక్షణ చర్యలు తీసుకోవడం లేదు.
పరిస్థితి ఎంత ఘోరమంటే!
మహానగరంలో రోజూ 6,500 మెట్రిక్‌ టన్నుల చెత్త ఉత్పత్తి అవుతోంది. కొన్ని నెలలుగా నిత్యం కేవలం 4వేల మెట్రిక్‌ టన్నుల చెత్తను మాత్రమే జవహర్‌నగర్‌ డంప్‌ యార్డుకు తరలిస్తున్నారు. మిగతాదంతా కాలనీల్లోనూ, రోడ్ల పక్కనే ఉండిపోతోంది. వారం రోజులుగా వర్షాల వల్ల చెత్త కుళ్లిపోయి దుర్గంధంతో కాలనీల్లో ఉండలేని పరిస్థితి నెలకొంటోంది. దోమలు పెరిగి జనం వ్యాధుల బారినపడుతున్నారు. హైదరాబాద్, రంగారెడ్డి, మేడ్చల్‌ జిల్లాలో కొద్దిరోజులుగా ప్రజలు విషజ్వరాలతో అల్లాడిపోతున్నారు. కానీ మూడు జిల్లాల వైద్య ఆరోగ్య శాఖ అధికారులు తూతూమంత్రపు చర్యలతో సరిపెడుతున్నారు.
మార్కెట్లు మరీ దారుణం!
వర్షాల వేళ నగరంలోని కూరగాయల మార్కెట్ల పరిస్థితి మరీ అధ్వానంగా తయారైంది. వ్యాపారులు అమ్మకాలు పూర్తయ్యాక మిగిలిన కూరగాయలు, వ్యర్థాలను ప్రాంగణంలోనే పడేసి వెళ్తున్నారు. వాటిని తరలించకపోవడంతో కుళ్లిపోయి కంపు కొడుతోంది. దీనిపై హైదరాబాద్ వ్యవసాయ మార్కెట్‌ కమిటీకి మూడు రోజుల కిందట జీహెచ్‌ఎంసీ నోటీసులిచ్చింది. మాదన్నపేట మార్కెట్‌లో చెత్త తరలింపు అధ్వానంగా ఉందని.. చర్యలు చేపట్టకపోతే మార్కెట్‌ మూసేస్తామని హెచ్చరించింది. ఇక మెహిదీపట్నం రైతుబజార్‌, ఎర్రగడ్డ మార్కెట్‌, భరత్‌నగర్‌ మార్కెట్‌, మలక్‌పేట మార్కెట్లలో చిన్న వర్షం పడినా కాలు మోపాలంటే కష్టమే. భరత్‌నగర్‌ మార్కెట్‌ సమీపంలో రోజుల తరబడి చెత్తకుప్పలు పేరుకుపోయే ఉంటున్నాయి.
ఖర్చు పెరిగింది.. సిబ్బంది అంతేమరి..?
హైదరాబాద్ మున్సిపల్‌ కార్పొరేషన్‌గా ఉన్నప్పుడు 50 లక్షల జనాభాకు రోడ్లు, వీధులు శుభ్రం చేసేందుకు 25వేల మంది శాశ్వత, 7 వేల మంది ఒప్పంద కార్మికులు ఉన్నారు. ఇప్పుడు జనాభా కోటి దాటింది. కార్మికులు కనీసం 50 వేల మంది కార్మికులు ఉండాలి. కానీ సంఖ్య మాత్రం పెరగలేదు. గతం కంటే చెత్త రవాణాకు ఖర్చును బల్దియా భారీగా పెంచింది. ఖర్చు పెంచినా అవసరమైన సిబ్బందిని పెంచట్లేదని.. ఫలితంగా ఇతర సిబ్బందిపై పనిభారం పెరుగుతోందని పలువురు సిబ్బంది వాపోతున్నారు.
మొర పెట్టుకున్నా స్పందనేది..?
స్థానిక సమస్యల ఫిర్యాదుల కోసం జీహెచ్‌ఎంసీ ట్విటర్‌లో ఓ అధికారిక ఖాతా నడుస్తోంది. దీనికి రోజూ నగరవ్యాప్తంగా వివిధ సమస్యలపై ఫిర్యాదులొస్తున్నాయి. ఏ ఒక్కదానికీ ఈ ఖాతా స్పందించకపోగా.. జీహెచ్‌ఎంసీ కమిషనర్‌ అధికారిక ఖాతా సైతం ఇదే తీరుగా ఉండటం గమనార్హం.
హైదరాబాద్ జిల్లాలో ఇదీ పరిస్థితి
- డయేరియా బాధితులు: 11,992
- వైరల్‌ ఫీవర్‌: 8912
- డెంగీ, మలేరియా, చికున్‌గన్యా: 69
ఇదీ చదవండి: HYD RAINS: హైదరాబాద్లో భారీ వర్షం... స్తంభించిన జనజీవనం
