ఏపీలోని విజయవాడలో ఓ ప్రేమోన్మాది ఘాతుకానికి ఇంజినీరింగ్ విద్యార్థిని బలైపోయింది. ఈ ఘటనపై జనసేన అధ్యక్షుడు పవన్ కల్యాణ్ స్పందించారు. ఈ ఘటన తనను ఎంతో బాధించిందని పవన్ అన్నారు. ఉన్నత విద్యను పూర్తి చేసుకుని జీవితంలో స్థిరపడాలని ఆశలతో ఉన్న బిడ్డ హత్యకు గురికావడం కన్నవారికి గర్భశోకాన్ని మిగులుస్తోందన్నారు. కొద్ది రోజుల కిందట విజయవాడలోనే ఓ నర్సు కూడా ఇలాగే ప్రేమ వేధింపుల బారినపడి చనిపోయిందన్నారు. కొవిడ్ కేంద్రంలో ఎంతో సేవ చేసిన ఆ యువతిని.. పెట్రోలు పోసి ఓ కిరాతకుడు హత్య చేశాడని ఆవేదన చెందారు. బాధితుల కుటుంబాలకు పవన్ ప్రగాఢ సానుభూతి తెలిపారు. ఈ హత్యలు అత్యంత హృదయవిదారకమన్నారు.
'రాష్ట్రంలో విద్యార్థినులు, యువతులపై లైంగిక వేధింపులు, అత్యాచారాలు, హత్యల కేసులు పెరుగుతుండటం దురదృష్టకరం. దిశ చట్టం చేశాం అని ప్రచారం చేసుకున్న ఏపీ ప్రభుత్వం ఆ చట్టం ద్వారా ఏం సాధించింది..? ఆడబిడ్డలకు రక్షణ ఇవ్వని చట్టాలు చేసి ప్రయోజనం ఏమిటి..? ప్రచారానికి ఉపయోగపడటం తప్ప. అత్యాచారాల కేసుల్లో కేసుల నమోదు విషయంలోనూ పోలీసు శాఖ స్పందన సక్రమంగా ఉండటం లేదు. ఇటీవల తిరుపతిలో ఓ యువతిపై ఒక మత ప్రచారకుడు లైంగిక దాడికి పాల్పడ్డ ఘటనపై కేసు నమోదు చేయకపోతే ఆ బాధితురాలు ‘స్పందన’లో ఫిర్యాదు ఇచ్చుకోవాల్సి వచ్చింది. పోలీసుశాఖ కఠినంగా వ్యవహరించి.. మహిళల రక్షణ కోసం చట్టాన్ని బలంగా ప్రయోగించాలి. నిందితులకు కఠిన శిక్షలు విధించినప్పుడే.. మహిళలకు తమ రక్షణ కోసం ఉద్దేశించిన చట్టాలపై నమ్మకం కలుగుతుంది.'----పవన్ కల్యాణ్, జనసేన అధినేత
ఇవీ చూడండి : ప్రేమంటూ తిరిగాడు... ఒప్పుకోలేదని చంపేశాడు..
