చిన్నపిల్లల కోసం ప్రత్యేకంగా రూపొందించిన ఆటలకు కొందరు బానిసలై.. వాటి కోసం రూ.లక్షలు ఖర్చు చేస్తున్నారు. ప్లే స్టోర్స్‌లో వేర్వేరు రకాల గేమ్స్‌ను డౌన్‌లోడ్‌ చేసుకుని తొలుత రూ.100, రూ.200 రీఛార్జి చేయాలంటూ తల్లిదండ్రులను అడిగి.. తర్వాత వారి నెట్‌బ్యాంకింగ్‌ పాస్‌వర్డ్‌లు.. ఓటీపీలను తీసుకుని ఆటల కోసమే రూ.లక్షలు ఖర్చుపెడుతున్నారు. నిషేధిత పబ్జీతో పాటు నలభై నుంచి యాభై రకాల ఆటలను ఆడుతూ రూ.వేలు.. రూ.లక్షలు నగదు బదిలీ చేస్తున్నారు. తల్లిదండ్రుల గారాబం.. పాఠశాలలు, ఇంటిపరిసర ప్రాంతాల్లో స్నేహితుల కారణంగా వీరంతా ఆటలాడుతున్నారని పోలీసులు గుర్తించారు. టీవీల్లో వచ్చే హింసాత్మక కార్యక్రమాలు.. చరవాణుల్లో క్రీడలు.. ఓడిపోకూడదన్న కసి వారిలో హింసను ప్రేరేపిస్తున్నాయని గమనించారు. వీటిని ఇప్పటి నుంచే కట్టడి చేయకపోతే భవిష్యత్తులో ప్రమాదాలంటూ హెచ్చరిస్తున్నారు.
ఆరునెలలు... ఆటలాండేందుకు రూ.36లక్షలు
హైదరాబాద్‌లో ఉంటున్న ఒక ఇంటర్‌ విద్యార్థి కేవలం ఆరునెలల్లో తన చరవాణిలో వింజోగేమ్‌ ఆడేందుకు రూ.36లక్షలు ఖర్చు చేశాడు. ప్రభుత్వశాఖలో విధులు నిర్వహిస్తున్న విద్యార్థి తండ్రి గతేడాది ఆకస్మికంగా చనిపోతే... నష్టపరిహారం కింద ప్రభుత్వం రూ.37లక్షలు ఇచ్చింది. వీటిని విద్యార్థి తల్లి, సోదరి, విద్యార్థి ఖాతాలో కొద్దినెలల క్రితం జమచేసింది. నగదు జమకాలేదంటూ వీరు కొద్దిరోజుల క్రితం ప్రభుత్వ కార్యాలయానికి వెళ్లగా... ముగ్గురి ఖాతాలో నగదు జమచేశాం.. ప్రస్తుతం మీ ముగ్గురి బ్యాంక్‌ ఖాతాల్లో రూ.520లు నగదు నిల్వలున్నాయని చెప్పారు. దీంతో షాక్‌కు గురైన విద్యార్థి తల్లి సైబర్‌ నేరస్థులు డబ్బు కాజేశారంటూ పోలీసులకు ఫిర్యాదు చేయగా... దర్యాప్తు చేపట్టిన పోలీసులు గతేడాది డిసెంబరు నుంచి మే 25 వరకు రూ.36లక్షలు వింజోగేమ్స్‌ కోసం విద్యార్థి వినియోగించాడని చూపించారు.
* వింజోగేమ్‌ను డౌన్‌లోడ్‌ చేసుకున్న విద్యార్థి గేమ్‌లోని అంచెలను(లెవల్స్‌) గెలిచేందుకు ఆడాడు. రూ.వెయ్యి, రూ.2వేలు లాభం రావడంతో రూ.5వేలు, రూ.10వేలు నగదు బదిలీ చేసుకుని ఆడగా... వరుసగా ఓడిపోయాడు..
* గెలిచేందుకు దగ్గరిదారుల కోసం అన్వేషించగా... వేర్వేరు అంచెలు దాటి కీలక దశకు చేరకున్న వారు తమ గేమ్‌ను విక్రయిస్తామంటూ పెట్టిన ప్రకటనలు విద్యార్థిని ఆకర్షించాయి. దీంతో సులభంగా గెలిచేందుకు వారికి రూ.లక్షల్లో నగదు జమచేసి కొన్నాడు.
* ఒకటి, రెండుసార్లు గెలిచినా... యాభైయ్యవ అంచెలో(లెవల్‌)ఉన్నా... తదుపరి అంచెలోకి వెళ్లలేక ఓడిపోయాడు. ఇలా నెలకు రూ.6లక్షల చొప్పున ఖర్చు చేసి వింజోగేమ్‌ను ఆడేందుకు డబ్బుల్లేక వదిలేశాడు.
బెదిరింపులు... నిరసనలు...
చరవాణిలో గేమ్స్ ఆడొద్దని తల్లిదండ్రులు హెచ్చరిస్తే.. పిల్లలు భోజనం తినకపోవడం, స్కూల్‌కు వెళ్లబోం అంటూ బెదిరిస్తున్నారు. మరికొంతమంది తల్లికి తెలియకుండా తండ్రి వద్ద, తండ్రికి తెలియకుండా తల్లివద్ద డబ్బులు తీసుకుని పవర్‌ప్లే గేమ్స్ ఆడుతున్నారు. తమ పిల్లలు గేమ్స్ ఆడుతున్నా సరే... ఏమీ చేయని నిస్సహాయ స్థితిలో కొందరు తల్లిదండ్రులున్నారు.
కఠినంగా ఉంటేనే... 'పిల్లలు గేమ్స్ ఆడడంపై తల్లిదండ్రులు కఠినంగా ఉండాలి. ఎనిమిదో తరగతి నుంచి ఇంటర్‌ చదివే విద్యార్థుల్లో చాలామంది ఈ ఆటలకు బానిసలయ్యారు. నెట్‌బ్యాంకింగ్‌ ద్వారా డబ్బులు తీసుకుంటున్నా.. పిల్లలను దండించడంలో తల్లిదండ్రులు వెనుకంజ వేస్తున్నారు. సామాజిక మాధ్యమాల ప్రభావంతో పిల్లలు, యువకుల ఆలోచనా ధోరణుల్లో తీవ్ర మార్పులొస్తున్నాయ్‌. ఇదంతా వారి తల్లిదండ్రుల పెంపకంలో వైఫల్యమే. ఇష్టానుసారంగా వారికి డబ్బులివ్వడంతో అలా తయారయ్యారు. కొన్ని విషయాల్లో కఠినంగా ఉంటేనే పిల్లలు కట్టుతప్పరు. గారాబం చేయడంతో వారి భవిష్యత్తును తల్లిదండ్రులే పాడుచేస్తున్నారు.' -- కేవీఎం ప్రసాద్‌, ఏసీపీ, సైబర్‌క్రైమ్స్‌
