భద్రాద్రి కొత్తగూడెం జిల్లా లక్ష్మీదేవిపల్లి మండల కేంద్రంలో రోడ్డుప్రమాదం చోటుచేసుకుంది. బైక్ అదుపుతప్పి కింద పడిపోయిన ఓ విద్యార్థి తల పైనుంచి ఆర్టీసీ బస్సు దూసుకెళ్లింది. ఈ ఘటనలో సాయిచరణ్ అనే విద్యార్థి అక్కడికక్కడే మృతి చెందాడు.
కొత్తగూడెం పట్టణానికి చెందిన నర్సింహా అనే వ్యక్తి స్థానిక మున్సిపాలిటీలో పని చేస్తున్నాడు. ఆయనకు ఇద్దరు కుమారులు. పెద్ద కుమారుడు సాయిచరణ్ లక్ష్మీదేవిపల్లిలోని ఓ ప్రైవేటు కళాశాలలో ఇంటర్ ద్వితీయ సంవత్సరం చదువుతున్నాడు. రోజూ మాదిరిగానే కళాశాలకు వెళ్లిన సాయిచరణ్.. మధ్యాహ్నం మరో విద్యార్థి బైక్పై ఇంటికి బయలుదేరాడు. స్థానిక వ్యవసాయ మార్కెట్ వద్ద యూటర్న్ తీసుకుంటుండగా.. బైక్ అదుపుతప్పింది. దీంతో వాహనంపై ఉన్న ఇద్దరూ కిందపడిపోయారు. పైకి లేస్తున్న క్రమంలో భద్రాచలం నుంచి కొత్తగూడెం వైపునకు వెళ్తున్న ఆర్టీసీ బస్సు సాయిచరణ్ తల పైనుంచి దూసుకెళ్లింది. బైక్ నడుపుతున్న సాయిచరణ్ శిరస్త్రాణం ధరించినా.. ప్రయోజనం లేకుండా పోయింది. ప్రమాదంలో అక్కడికక్కడే మృతి చెందాడు.
విషయం తెలుసుకున్న సాయిచరణ్ తల్లిదండ్రులు హుటాహుటిన ఘటనా స్థలానికి చేరుకున్నారు. బస్సు డ్రైవర్‌ అతివేగం, అజాగ్రత్త వల్లే తమ కుమారుడి ప్రాణాలు పోయాయంటూ ఆందోళనకు దిగారు. ఈ మేరకు పోలీసులకు ఫిర్యాదు చేశారు. కేసు నమోదు చేసుకున్న పోలీసులు.. దర్యాప్తు ప్రారంభించారు.
ఇదీ చూడండి: Student Suicide in Chittoor : అధికార పార్టీ నేత కూతురి కోసం.. చదువుల తల్లిని చంపేశారా?
