ఏపీ ఎమ్మెల్యే వెలగపూడిని అదుపులోకి తీసుకున్న పోలీసులు

ఏపీలోని విశాఖ తూర్పు నియోజకవర్గం ఎమ్మెల్యే వెలగపూడి రామకృష్ణబాబును విశాఖ మూడో పట్టణ పోలీసులు అదుపులోకి తీసుకున్నారు. అయితే ఏ కేసు విషయంలో ఆయనను స్టేషన్​కు తరలించారన్న విషయాన్ని మాత్రం చెప్పడం లేదు. సమాచారం తెలుకున్న తెదేపా కార్యకర్తలు ఆయనను కలవడానికి తరలివస్తున్నారు.

ఆంధ్రప్రదేశ్​లోని విశాఖ తూర్పు నియోజకవర్గం ఎమ్మెల్యే వెలగపూడి రామకృష్ణబాబును విశాఖ మూడో పట్టణ పోలీసులు అదుపులోకి తీసుకున్నారు. 21వ వార్డు.. బూత్ నెంబర్ 15లో అవకతవకలు జరుగుతున్నాయన్న సమాచారంతో తెలుగునాడు విద్యార్థి సమాఖ్య రాష్ట్ర అధ్యక్షుడు ప్రణవ్ గోపాల్ అక్కడికి చేరుకున్నారు. ఆ విషయమై ఎన్నికల అధికారులను ప్రశ్నించగా పోలీసులు అతడిని అదుపులోకి తీసుకున్నారు. ఈ విషయం తెలుసుకున్న ఎమ్మెల్యే వెలగపూడి అక్కడికి చేరుకోగా ఎమ్మెల్యేను కూడా అదుపులోకి తీసుకుని పోలీస్ స్టేషన్​కు తరలించారు.

వెలగపూడిని ఏ కేసులో అరెస్టు చేశారన్న విషయాన్ని పోలీసులు ఎవరికీ చెప్పడం లేదు. మీడియాను కూడా ఆయనతో మాట్లాడనీయకుండా అడ్డుకున్నారు. ప్రస్తుతం ఎమ్మెల్యే వెలగపూడి కారు మూడో పట్టణ పోలీస్ స్టేషన్​లోనే ఉంది. ఎమ్మెల్యేను అదుపులోకి తీసుకున్న విషయం తెలుసుకున్న పార్టీ కార్యకర్తలు పోలీస్ స్టేషన్​కు తరలివస్తున్నారు. ఆయనను ఏ కారణం చేత అరెస్ట్ చేశారో చెప్పాలని డిమాండ్ చేస్తున్నారు.

ఇదీ చూడండి: జనవరిలో రామగుండం థర్మల్​ ప్రాజెక్టు తొలి యూనిట్​ ప్రారంభం