MLA Rajasing Disappointment: గోషామహల్ ఎమ్మెల్యే రాజాసింగ్.. తరచూ సంచలన వ్యాఖ్యలు చేస్తూ వివాదాల్లో నిలుస్తుంటారు. అయితే.. ఈసారి మాత్రం అందుకు భిన్నంగా.. అలక మంచం ఎక్కి.. వార్తల్లో నిలిచారు. సార్వత్రిక ఎన్నికల్లో భాజపా నుంచి గెలిచిన ఏకైన ఎమ్మెల్యేగా రాజాసింగ్.. రాష్ట్రంలో ప్రత్యేక ఆకర్షణగా నిలిచారు. అప్పటి నుంచి తనదైనశైలిలో తెరాస నేతలపై విమర్శలు, కేటీఆర్పై సెటైర్లతో పాటు పలుమార్లు వివాదాస్పద వ్యాఖ్యలు చేస్తూ.. వార్తల్లో నిలుస్తూ వస్తున్నారు. అయితే.. ఈసారి మాత్రం.. రాజాసింగ్ అలిగారు. ఎవరిమీదో కాదండి.. సొంత పార్టీపైనే..!
నిజామాబాద్ జిల్లా బోధన్ పట్టణంలో "ప్రజాగోస.. భాజపా భరోసా" యాత్ర కొనసాగుతోంది. ఈ యాత్రంలో రాజాసింగ్తో పాటు పలువురు భాజపా అగ్రనేతలు పాల్గొంటున్నారు. ఈ క్రమంలోనే.. ఈరోజు యాత్ర జరుగుతుండగానే రాజాసింగ్ కాన్వాయ్ మధ్యలో నుంచి వెళ్లిపోయారు. ఏడు రోజులుగా యాత్ర కొనసాగుతోన్నా.. జనం నుంచి ఆదరణ అంతంతమాత్రంగానే ఉంది. దీనిపై ఇప్పటికే రాజాసింగ్ కాస్త అసంతృప్తిగా ఉన్నట్టు సమాచారం. అయితే ఈరోజు కూడా.. యాత్రలో జనం అంతగా పాల్గొనకపోవటంతో కొంత అసహనానికి లోనైనట్టు తెలుస్తోంది. ఈ క్రమంలోనే రాజాసింగ్ ఏకంగా కాన్వాయ్ మధ్యలో నుంచి వాకౌట్ చేశారు.
అయితే.. తాను వెళ్లిపోతున్నట్టు కనీసం.. జిల్లా, నియోజకవర్గ నాయకులకు కూడా సమాచారం ఇవ్వకపోవటం గమనార్హం. రాజాసింగ్ వాకౌట్తో ఉలిక్కిపడ్డ భాజపా నాయకులు.. ఏం జరిగిందో..? ఏం చేయాలో.. తెలియక తలలుపట్టుకున్నారు. చేసేదేమీలేక ముఖ్య అతిథి లేకుండానే వచ్చిన ఆ కొంత మంది కార్యకర్తలతోనే సభను కొనసాగించారు. అయితే.. రాజాసింగ్ అలక మాత్రం భాజపా జిల్లా, నియోజకవర్గ నాయకులపైనే అని అర్థమవుతోంది. యాత్రకు జనసమీకరణ చేయలేకపోయారనో.. లేక జనంలోకి పార్టీని సరిగ్గా తీసుకెళ్లలేకపోతున్నారనో.. కారణమేదైనా జిల్లా, నియోజకవర్గ నాయకుల పనితీరు నచ్చకపోవటమే రాజాసింగ్ అలకకు కారణమని.. శ్రేణుల్లో గుసగుసలు వినిపిస్తున్నాయి.
ఇవీ చూడండి:
