హైదరాబాద్లో భాజపాను గెలిపిస్తే పాతబస్తీపై సర్జికల్ స్ట్రైక్స్ చేస్తామంటున్నారు...అదేమైనా పాకిస్థాన్లో ఉందా అని తెరాస కార్యనిర్వహక అధ్యక్షుడు కేటీఆర్ మండిపడ్డారు. హైదరాబాద్ ప్రశాంతంగా ఉంటేనే ఆపిల్, అమెజాన్, ఫేక్‌బుక్ వంటి బహుళ జాతి కంపెనీలు వస్తాయని.. మన పిల్లలకు కొలువులు దొరుకుతాయని కేటీఆర్ అన్నారు. మతం పేరిట రాజకీయం చేసే వారిని నమ్మవద్దని హితవు పలికారు. గల్లీ పార్టీ కావాలా.. దిల్లీ పార్టీ కావాలా... గుజరాత్ గులాములు కావాలా, హైదరాబాద్ గులాబీలు కావాలా తేల్చుకోవాలని కేటీఆర్ కోరారు. ముషీరాబాద్ నియోజకవర్గంలోని గాంధీనగర్ కూడలి, రాంనగర్ క్రాస్ రోడ్ వద్ద జరిగిన రోడ్ షోలలో కేటీఆర్ పాల్గొని ప్రసంగించారు. 132 కోట్ల మంది భారతీయులను మోసం చేసినందుకు మోదీపై ఛార్జిషీటు వేయాలన్నారు.
దిల్లీ నుంచి వచ్చిన టూరిస్టులు వస్తారు పోతారు... పక్కా లోకల్‌ తెరాస మాత్రమేనని స్పష్టం చేశారు. కేంద్ర హోంశాఖ సహాయ మంత్రి కిషన్ రెడ్డి, లక్ష్మణ్‌లు బోగస్ మాటలు మాట్లాడుతున్నారని ఆక్షేపించారు. హైదరాబాద్‌కు వరదలు వస్తే ఆరున్నర లక్షల మందికి 10వేల రూపాయల ఆర్థిక సహాయం చేశామన్నారు. ఆ వివరాలను కిషన్ రెడ్డికి అందిస్తానని... మోదీని ఒప్పించి ఒక్కొక్కరికి 25వేల రూపాయలు ఇప్పిస్తే దీపాలు వెలిగిస్తాం... గంటలు కొడుతామన్నారు. పదివేలు ఇస్తే ఆపినోళ్లు 25వేలు ఇస్తారా ఆలోచించాలన్నారు. ఎవ్వరూ ఇవ్వరని మళ్లీ మేమే 4వ తేదీ తర్వాత వరద సహాయం చేస్తామని హామీ ఇచ్చారు.
ఇవీ చూడండి: మోదీది బేచో ఇండియా... తమది సోచో ఇండియా: కేటీఆర్
