ధరణి పోర్టల్లో ఉన్న అన్ని సమస్యల పరిష్కారం కోసం మాడ్యూల్స్ రూపొందించడం సహా వాటిపై అందరికీ అవగాహన కల్పించాలని అధికారులను ఆర్థిక, వైద్యారోగ్య శాఖ మంత్రి హరీశ్రావు ఆదేశించారు. ధరణిపై ఏర్పాటైన మంత్రివర్గ ఉపసంఘం (Dharani news) బీఆర్కే భవన్లో ఇవాళ భేటీ అయింది. మంత్రులు సబిత, ప్రశాంత్ రెడ్డి, జగదీశ్ రెడ్డి హాజరయ్యారు.
మైలురాయిగా ధరణి పోర్టల్..
ధరణి పోర్టల్లో ఎదురవుతున్న వివిధ రకాల సమస్యలు పరిష్కరించేందుకు మాడ్యూల్స్లో చేయాల్సిన మార్పులు, చేర్పులుపై సమావేశంలో చర్చించారు. భూ రికార్డుల నిర్వహణలో ధరణి పోర్టల్ మైలురాయిగా నిలుస్తుందన్న హరీశ్రావు.. ఒక సంవత్సర కాలంలోనే 10 లక్షల పైబడి లావాదేవీలు ధరణి ద్వారా జరిగాయన్నారు. నిషేధిత జాబితాలో ఉంచిన భూములపై 98,049 దరఖాస్తులు రాగా.. వాటిలో 82,472 దరఖాస్తులను పరిష్కరించినట్లు అధికారులు వివరించారు. ముఖ్యమంత్రి కేసీఆర్ ఆకాంక్షల మేరకు ధరణి పోర్టల్ను మరింత పరిపుష్ఠం చేసేలా పొందుపర్చాల్సిన ఐచ్చికాలపై సమావేశంలో చర్చించారు. భూ రికార్డుల నమోదులో జరిగిన పొరపాట్లను సరిచేసేందుకు అనువైన మాడ్యూల్స్ను త్వరగా అందుబాటులోకి తేవాలని అధికారులకు హరీశ్రావు సూచించారు.
శిక్షణ ఇవ్వండి..
ధరణి పోర్టల్లో ఎదుర్కొన్న పలు సమస్యలను పరిష్కరించేందుకు అనువైన మాడ్యూల్స్, ఆప్షన్స్ పట్ల సరైన అవగాహన లేనందున సమస్యలు పరిష్కారం కావడం లేదని హరీశ్రావు అభిప్రాయపడ్డారు. వీటిపై అధికారులు, మీసేవ ఆపరేటర్లకు జిల్లా స్థాయిలో ఒక రోజు శిక్షణ కార్యక్రమాలను నిర్వహించాలని అధికారులకు సూచించారు. జిల్లా పరిషత్, మున్సిపల్ సమావేశాలకు జిల్లా కలెక్టర్లు హాజరై.. ధరణి గురించి పవర్ పాయింట్ ప్రజేంటేషన్ ద్వారా ప్రజాప్రతినిధులకు అవగాహన కల్పించాలని చెప్పారు. కలెక్టరేట్లలో హెల్ప్డెస్క్లు నెలకొల్పాలని.. ఇవి ప్రజలకు అవగాహన కల్పించడం సహా దరఖాస్తులను అప్లోడ్ చేసేందుకు అనువుగా మీసేవ కేంద్రాల తరహాలో పనిచేసేలా ఏర్పాట్లు చేయాలని మంత్రివర్గ ఉపసంఘం సభ్యులు సూచించారు. ఇవాళ చర్చించిన అంశాలపై అనువైన టెక్నికల్ మాడ్యూల్స్ను వెంటనే రూపొందించాలని అధికారులను ఆదేశించారు. ఈనెల 24వ తేదీన మంత్రివర్గ ఉపసంఘం తిరిగి సమావేశం కానుంది.
ఇదీచూడండి: ktr on Paddy Procurement: 'తెలంగాణ ధనం తీసుకునే కేంద్రం... ధాన్యం తీసుకోదా?'
