'ప్రతి ఆదివారం పది గంటలకు పది నిమిషాలు' కార్యక్రమంలో మంత్రి కేటీఆర్ పాల్గొన్నారు. సీజనల్ వ్యాధుల నివారణ కోసం పురపాలక శాఖ ఆధ్వర్యంలో ఈ కార్యక్రమం చేపట్టారు. ఇందులో భాగంగా ప్రగతి భవన్లోని పూల కుండీలు, ఇతర ప్రాంతాలను మంత్రి తారక రామారావు పరిశీలించారు. ఆయా ప్రాంతాల్లో పేరుకుపోయిన నీటిని శుభ్రం చేశారు. ప్రగతి భవన్ ప్రాంగణం మొత్తం కలియ తిరిగిన కేటీఆర్... జీహెచ్ఎంసీ ఎంటమాలజీ విభాగం సలహా మేరకు యాంటీ లార్వా మందులను చల్లారు.
రానున్న వర్షాకాలాన్ని దృష్టిలో ఉంచుకుని ఈ కార్యక్రమానికి శ్రీకారం చుట్టినట్లు మంత్రి తెలిపారు. యాంటీ లార్వా మందులు చల్లటం, నీరు నిల్వ లేకుండా చూసుకోవటం ద్వారా దోమల వ్యాప్తిని అరికట్టవచ్చని కేటీఆర్ అభిప్రాయపడ్డారు. ఇందుకు ప్రజలు పూర్తి స్థాయిలో మద్దతు ఇవ్వాలని మంత్రి కోరారు. రానున్న పది ఆదివారాలపాటు.. పది నిమిషాలు చొప్పున ప్రతి ఒక్కరు తమ ఇళ్లు, పరిసరాలను పరిశుభ్రపరుచుకోవాలని సూచించారు. ఈ కార్యక్రమంలో జీహెచ్ఎంసీ మేయర్ బొంతు రామ్మోహన్ పాల్గొన్నారు.
ఇవీచూడండి: ఈనాడు-ఈటీవీ భారత్ కథనానికి స్పందన.. చిన్నారికి కంటి చూపు
