ఏపీలో మరో ఎస్సీ వ్యక్తిపై దాడి జరిగింది. బాధ్యాతాయుతమైన ఉద్యోగంలో ఉన్న సీఐ.. బూటు కాలితో ఎస్సీ వ్యక్తిని తన్నాడు. ఈ ఘటన శ్రీకాకుళం జిల్లా కాశీబుగ్గ పోలీస్ స్టేషన్ ఆవరణలోనే జరగడం గమనార్హం. చుట్టూ గ్రామ పెద్దలు ఉన్నా ఒక్కరూ పట్టించుకోలేదు.
పలాస మండలం టెక్కలిపట్నంకు చెందిన ఎస్సీ వ్యక్తి ఇంటి స్థలం కోసం గత 5 రోజులుగా వివాదం నడుస్తోంది. తనకు న్యాయం చేయాలని కాశీబుగ్గ పోలీస్ స్టేషన్కు వచ్చి.. సీఐకు పరిస్థితిని వివరిస్తుండగానే.. సదరు అధికారి ఆ వ్యక్తిపై తన ప్రతాపం చూపాడు. బూటు కాలితో తన్ని.. దాడికి దిగాడు. పక్కనే ఉన్న బాధితుడి తల్లి... సీఐ నుంచి తన కుమారుడుని కాపాడుకునేందుకు ప్రయత్నించింది. చుట్టూ పెద్ద మనుషులు ఉన్నా ఏ ఒక్కరూ పట్టించుకోలేదు. బాధితుడు ఏడుస్తున్నా.. సీఐ కనికరం చూపలేదు.
- సీఐ వేణుగోపాల్పై సస్పెండ్ వేటు
ఎస్సీ వ్యక్తిపై.. సీఐ వేణుగోపాల్ దాడిచేసిన దృశ్యాలు సామాజిక మాద్యమాల్లో వైరల్ అయ్యాయి. ఘటనపై స్పందించిన విశాఖ రేంజ్ డీఐజీ.. కాశీబుగ్గ సీఐ వేణుగోపాల్ను సస్పెండ్ చేశారు. సివిల్ వివాదంలో ఫిర్యాదుదారుడిపై అనుచితంగా ప్రవర్తించినందుకు చర్యలు తీసుకున్నట్లు వెల్లడించారు.
ఇవీచూడండి: గిఫ్ట్ ఏ స్మైల్: కేటీఆర్కు చెక్కు అందించిన మంత్రి పువ్వాడ, ఎమ్మెల్యే సంజయ్
