రుణయాప్ల కేసుల్లో నిర్వాహకుల ఖాతాల్లోంచి అక్రమంగా నగదు బదిలీ అయిన వ్యవహారంపై సైబర్క్రైం పోలీసులు ముమ్మర దర్యాప్తు చేస్తున్నారు. ఇప్పటికే ఈ కేసులో ఆనంద్ అనే వ్యక్తిని హైదరాబాద్ సైబర్ క్రైం పోలీసులు అరెస్ట్ చేశారు. ఈ వ్యవహారం వెనుక ఇంకా ఎవరున్నారనే కోణంలో ఆరా తీస్తున్నారు.
మే 13న కోల్కతాలోని న్యూ అలీపూర్ ఐసీఐసీఐ శాఖకు వెళ్లిన ఓ వ్యక్తి.. సైబర్ క్రైం ఎస్సైనంటూ బ్యాంకు అధికారులను నమ్మించాడు. 12 ఖాతాల నంబర్లు ఇచ్చి వాటిని అన్ ప్రీజ్ చేయాలని కోరాడు. అందులో ఆరు ఖాతాలను అధికారులు అన్ఫ్రీజ్ చేశారు. వాటిలో రెండు అలీపూర్ శాఖకు చెందినవి కాగా... మిగిలిన నాలుగు దిల్లీ, హరియాణాలోని ఐసీఐసీఐ ఖాతాలు. అన్ఫ్రీజ్ అయిన వెంటనే అలీపూర్ శాఖ నుంచి రూ.90 లక్షలు... మిగతా బ్యాంకుల నుంచి 28 లక్షలు.. ఇతర ఖాతాకు బదిలీ అయ్యాయి.
చైనాకు బదిలీ?
అప్రమత్తమైన పోలీసులు.. ఆ మొత్తం అంటే కోటి 18 లక్షల రూపాయలు హైదరాబాద్ బేగంపేటకు చెందిన ఆనంద్ గన్నోజు అనే వ్యక్తి ఖాతాకు బదిలీ అయినట్లు గుర్తించారు. అతని ఖాతాను స్తంభింపచేశారు. అయితే అప్పటికే ఆ నగదు అంతా చైనాకు బదిలీ అయినట్లు సైబర్ క్రైం పోలీసులు అనుమానిస్తున్నారు.
అధికారుల హస్తం ఉందా?
కోల్కతాలోని అలీపూర్ ఐసీఐసీఐ అధికారులు నిబంధనలకు విరుద్ధంగా ఖాతాలను అన్ఫ్రీజ్ చేసినట్లు సైబర్ క్రైం పోలీసులు గుర్తించారు. ఈ వ్యవహారంలో బ్యాంకు అధికారుల హస్తం ఏమైనా ఉందా.. అనే కోణంలో దర్యాప్తు చేస్తున్నారు. ఈ విషయాన్ని ఐసీఐసీఐ ఉన్నతాధికారుల దృష్టికి తీసుకువెళ్లారు.
అమాయకుల నుంచి అధిక వడ్డీ వసూలు చేయడం సహా మానసికంగా కుంగదీసిన ఘటనలో రుణయాప్ల నిర్వాహకులపై సైబర్ క్రైం పోలీసులు కేసు నమోదుచేశారు. సుమారు 1100 బ్యాంకు ఖాతాలను స్తంభింపచేశారు. వాటిలో ఉన్న రూ.200 కోట్ల నగదును నిలుపుదల చేశారు. ఈ కేసులో 28 మంది అరెస్టవ్వగా.. 25 మంది బెయిల్పై బయటకు వచ్చారు.
ఇదీచూడండి: LOAN APPS: సైబర్ పోలీసునంటూ రూ.1.18 కోట్లు స్వాహా
