ఎండ పెరుగుతోంది. మిట్ట మధ్యాహ్నం బయటికి రావాలంటే జనం జంకుతున్నారు. రాత్రిళ్లు తేమ తగ్గిపోతుండటంతో ఉక్కపోతతో ప్రజలు అల్లాడటం ప్రారంభమైంది. ఈ ఏడాది వేసవి మరింత మండనుందని పరిస్థితులు చెప్పకనే చెబుతున్నాయి. బుధవారం భద్రాద్రి జిల్లాలో పలుచోట్ల 40.2 డిగ్రీల వరకూ గరిష్ఠ ఉష్ణోగ్రత నమోదైంది. సాధారణం కన్నా 2 డిగ్రీల వరకూ అదనంగా పెరిగింది. ఈ నెల 1న పెద్దపల్లి జిల్లా మంథనిలో 39.8 డిగ్రీలు.. ఇదే జిల్లా శ్రీరాంపూర్‌, ఖమ్మం జిల్లా మధిర, కూసుమంచిలలో గరిష్ఠంగా 39.7 డిగ్రీల ఉష్ణోగ్రతలు నమోదయ్యాయి. 37 డిగ్రీలు దాటితే వడదెబ్బ ముప్పు పొంచి ఉన్నట్లేనని నిపుణులు పేర్కొంటున్నారు.
మరోవైపు పిడుగుపాట్లు కూడా తెలంగాణలో ఎక్కువగా సంభవిస్తాయి. వేడి కారణంగా గాలి అస్థిరమై క్యుములోనింబస్‌ మేఘాలు ఏర్పడి ఉరుములు, పిడుగులతో వర్షం, వడగళ్లు పడుతుంటాయని నిపుణులు సూచిస్తున్నారు. రాష్ట్రంలో ఈ ఏడాది సాధారణం కన్నా 0.5 నుంచి ఒక డిగ్రీ వరకు అధిక ఉష్ణోగ్రతలు నమోదయ్యే అవకాశాలున్నాయని వాతావరణ శాఖ అంచనా వేస్తోంది. ప్రజలు అప్రమత్తంగా ఉండాలని ప్రకృతి విపత్తుల నిర్వహణ శాఖ హెచ్చరిస్తోంది. అన్ని ప్రభుత్వ ఆస్పత్రుల్లో ఓఆర్‌ఎస్‌ సిద్ధం చేసుకోవాలని ఇప్పటికే సూచించింది. ఉపాధి హామీ పనుల విషయంలోనూ జాగ్రత్తలు తీసుకోవాలని కలెక్టర్లను ఆదేశించింది. రాష్ట్రంలో ఏటా గరిష్ఠ ఉష్ణోగ్రతలు 45 డిగ్రీలు దాటుతున్నాయి. వడదెబ్బకు ప్రాణాలు కోల్పోతున్నారు. అత్యధికంగా 2015లో 540 మంది, 2016లో 324, 2017లో 108 మంది మృత్యువాత పడ్డారు.
ప్రమాదం మన చుట్టూ ఉన్నట్లే
సాధారణంగా మనిషి శరీరం 37 డిగ్రీల వరకు తట్టుకుంటుంది. అంతకన్నా ఉష్ణోగ్రత పెరిగితే గాలిలో ఉండే వేడిని శరీరం తీసుకోవడం ప్రారంభమవుతుంది. ఇదే సమయంలో గాలిలో తేమ పెరిగితే వ్యక్తి వడదెబ్బకు గురై అనారోగ్యం పాలవుతాడు. గాలిలో తేమ అసాధారణంగా పెరిగితే ఉష్ణోగ్రత తక్కువగా ఉన్నప్పటికీ వడదెబ్బకు లోనవుతారు. గాలిలో తేమ 75 శాతం ఉంటే ఉష్ణోగ్రత 34 డిగ్రీలున్నా...ఆ తేమ వల్ల ఉష్ణోగ్రత 49 డిగ్రీలున్నంత ప్రభావాన్ని చూపుతుంది. దీంతో అనారోగ్యానికి గురవుతారు. ఒకవేళ వాతావరణంలో 31 డిగ్రీల ఉష్ణోగ్రత ఉన్న సమయంలో గాలిలో తేమ 100 శాతానికి చేరితే అప్పుడు కూడా 49 డిగ్రీల వాతావరణంలో ఉన్నట్లుగా మనిషి అనారోగ్యానికి గురవుతారు.
బహుళ అంతస్తుల్లో జాగ్రత్త
అధిక ఉష్ణోగ్రతలున్నప్పుడు చల్లని ప్రదేశాల్లో ఉండాలి. గాలిలో తేమ శాతం ఎక్కువగా ఉన్నా జాగ్రత్త పడాలి. తలుపులు, కిటికీలు తెరిచి విశాలంగా ఉన్న గదుల్లో సేదతీరాలి. ప్రధానంగా వేడి ఎక్కువగా ఉన్న ప్రాంతాల్లో సాయంత్రానికి క్యుములోనింబస్‌ మేఘాలు ఏర్పడి పిడుగులు, వడగళ్లు పడతాయి. ఆరుబయట, చెట్ల కింద, చెరువుల సమీపంలో ఉండొద్దు. సెల్‌ఫోన్‌, విద్యుత్తు టవర్లకు దూరంగా ఉండాలి. బహుళ అంతస్తుల భవనాలపైనా పిడుగులు పడే అవకాశాలు ఎక్కువ. రాగి తాపడంతో భూమిని అనుసంధానం చేసే వ్యవస్థ ఏర్పాటు చేసుకుంటే పిడుగు పడినా నేరుగా భూమిలోకి ఆ విద్యుత్తు వెళ్లిపోతుంది. అనుసంధాన పరికరాలను సరిచూసుకోవడం మేలు. - రాజారావు, విశ్రాంత వాతావరణ అధికారి
