రాష్ట్రవ్యాప్తంగా ఆసుపత్రులకు కరెంట్‌ సరఫరాలో అంతరాయం ఏర్పడి.. కరోనా బాధితులకు ప్రాణ సంకటం కలగకుండా విద్యుత్‌శాఖ అధికారులు ముందు జాగ్రత్త చర్యలు చేపట్టారు. కరోనా చికిత్స చేసే ఆసుపత్రులకు విద్యుత్ అంతరాయం కలగకుండా చేశారు. ప్రధానంగా హైదరాబాద్‌లోని కీలకమైన ఆసుపత్రులకు రెండు సబ్‌స్టేషన్‌ల నుంచి విద్యుత్ లైన్‌లను సిద్ధం చేశారు. ఒక లైన్‌లో అంతరాయం ఏర్పడితే మరో లైన్ నుంచి తక్షణమే కరెంట్‌ అందిస్తారు.
24 గంటల కంట్రోల్ రూమ్..
నిమ్స్, టిమ్స్, గాంధీ వంటి ఆసుపత్రుల్లో 24 గంటలపాటు నిరంతరం పనిచేసేలా సిబ్బందిని నియమించారు. విద్యుత్ సౌధ ప్రధాన కార్యాలయంలోనూ జెన్కో, ట్రాన్స్కో కంట్రోల్ రూమ్‌లు ఏర్పాటు చేసి... 24 గంటలు అధికారులు నేరుగా పర్యవేక్షిస్తున్నారు. ఇంతచేసినా అకాల వర్షాల ముప్పుతో అప్రమత్తంగా ఉండాలని ఆదేశించామని ట్రాన్స్కో, జెన్కో సీఎండీ ప్రభాకర్‌రావు వెల్లడించారు.
ప్రైవేటులోనూ..
రాష్ట్రంలోని 113 ప్రభుత్వ, 1050 ప్రైవేట్ ఆసుపత్రుల్లో కొవిడ్ చికిత్సలు అందిస్తున్నారు. ఆ ఆసుపత్రులన్నింటికి అదనపు విద్యుత్ సరఫరా చేస్తున్నామని విద్యుత్ శాఖ వెల్లడించింది. టిమ్స్, గాంధీ, నిమ్స్ వంటి ప్రధాన ఆసుపత్రులకు కరెంట్‌ సరఫరాలో ఎలాంటి ఇబ్బందులు లేకుండా చూస్తున్నామని తెలిపింది. చెస్ట్, ఫీవర్, కింగ్ కోఠి ఆసుపత్రులకూ అదనపు విద్యుత్ సరఫరాకు ఏర్పాట్లు చేశామన్నారు. ప్రైవేట్ ఆసుపత్రుల్లోనూ విద్యుత్ సరఫరా ఇబ్బందులు తలెత్తకుండా సంస్థ నుంచి నోడల్ అధికారులను నియమించామన్నారు.
రాష్ట్రంలో ఆక్సిజన్ ఉత్పత్తి, రీ ఫిల్లింగ్ స్టేషన్‌ల వద్ద విద్యుత్ ఆటంకాలు లేకుండా అధికారులు చర్యలు తీసుకున్నారు. 130 టన్నుల ఆక్సిజన్ ఉత్పత్తికి సంబంధించిన రెండు ప్లాంట్లు.. 30 రీ ఫిల్లింగ్ స్టేషన్‌ల వద్ద జాగ్రత్తలు తీసుకున్నారు.
