లాక్డౌన్ కొనసాగుతున్న తరుణంలో ఆర్థిక ఇబ్బందులను అధిగమించేందుకు కేంద్రం సరైన చర్యలు తీసుకోవాలని ముఖ్యమంత్రి కేసీఆర్ కోరారు. ప్రధానమంత్రి నరేంద్రమోదీ నిర్వహించిన దృశ్యమాధ్యమ సమీక్షలో పలు సూచనలు చేశారు. రిజర్వ్ బ్యాంకు క్వాంటేటీవ్ ఈజింగ్ విధానాన్ని అవలంభించి హెలికాప్టర్ మనీ రూపంలో నిధులు విడుదల చేయాలని ప్రతిపాదించారు. సంక్షోభాల సమయంలో ఇదే తరహా విధానాన్ని అవలంభిస్తున్నట్లు కేసీఆర్ తెలిపారు.
రాష్ట్రాలకు రుణ పరిమితిని మూడు నుంచి ఐదు లేదా ఆరు శాతానికి పెంచాలని కేసీఆర్ కోరారు. వీలైనంత త్వరగా నిర్ణయం తీసుకోవాలని ప్రధానిని కోరారు. రాష్ట్రాల అప్పులకు కనీసం ఆర్నెళ్ల వాయిదా వేసేలా కేంద్రం చొరవ చూపాలని కోరారు. ధాన్యం సేకరణకు ఎఫ్సీఐ నుంచి డబ్బు వచ్చేందుకు సమయం పడుతుందన్న ముఖ్యమంత్రి... బకాయిలపై బ్యాంకులు ఒత్తిడి చేయకుండా చూడాలని కోరారు.
ప్రధానమంత్రి సహాయనిధికి ఇస్తున్న అన్ని మినహాయింపులను ముఖ్యమంత్రి సహాయనిధికీ ఇవ్వాలని విజ్ఞప్తి చేశారు. ప్రస్తుత పరిస్థితులను పూర్తిస్థాయిలో అధ్యయనం చేసి భవిష్యత్ కార్యాచరణను ఖరారు చేసేందుకు వీలుగా ప్రధాని అధ్యక్షతన కొందరు ముఖ్యమంత్రులతో టాస్క్ఫోర్స్ను ఏర్పాటు చేయాలని కేసీఆర్ ప్రతిపాదించారు.
ఇవీచూడండి: 'నిత్యావసరాల రవాణా కోసం 32 పార్సల్ రైళ్లు'
