'ఎవరికి బలిసింది సార్​.. మీరు ఎంత తింటున్నారో బహిరంగ చర్చకు సిద్ధమా?'

Thammareddy Bharadwaj: సినీ పరిశ్రమ గురించి ఏపీ నేతల వ్యాఖ్యలపై తమ్మారెడ్డి భరద్వాజ తీవ్రస్థాయిలో స్పందించారు. సినీ పరిశ్రమను నిందిస్తున్న నాయకులు తలదించుకోవాలన్నారు. కుల ప్రస్తావన లేకుండా ఉపాధి కల్పించేది సినీ పరిశ్రమేనని.. సామాజిక వర్గాల పేరుతో రాద్ధాంతం ఎందుకు చేస్తున్నారని ప్రశ్నించారు. ఎమ్మెల్యేలు ఎంత తింటున్నారో బహిరంగ చర్చకు సిద్ధమా? అని సవాల్ విసిరారు.

Thammareddy Bharadwaj: సినీ పరిశ్రమపై ఏపీ నేతలు చేసిన వ్యాఖ్యలపై దర్శకుడు, నిర్మాత తమ్మారెడ్డి భరద్వాజ ఘాటుగా స్పందించారు. హైదరాబాద్​లోని ఫిల్మ్‌ఛాంబర్‌లో మాట్లాడిన ఆయన.. సినీ పరిశ్రమను నిందిస్తున్న నాయకులు తలదించుకోవాలన్నారు. కుల ప్రస్తావన లేకుండా ఉపాధి కల్పించేది సినీ పరిశ్రమేనని తేల్చి చెప్పారు. సామాజిక వర్గాల పేరుతో రాద్ధాంతం ఎందుకు చేస్తున్నారని ప్రశ్నించారు. ఎమ్మెల్యేలు ఎంత తింటున్నారో బహిరంగ చర్చకు సిద్ధమా? అంటూ సవాల్ విసిరారు. రూ.కోట్లు పెట్టి పైసాపైసా ఏరుకుంటున్నామన్న ఆయన.. రాజకీయ నాయకులు మాత్రం రూపాయి పెట్టి కోట్లు కొల్లగొడుతున్నారంటూ ధ్వజమెత్తారు.

వైకాపా ఎమ్మెల్యే ఏం అన్నారంటే..

సినిమా వాళ్ల పొట్టకొడుతున్నారని తెదేపా అధినేత చంద్రబాబు చేసిన వ్యాఖ్యలను ఖండిస్తూ.. వైకాపా ఎమ్మెల్యే ప్రసన్నకుమార్​రెడ్డి సోమవారం ఆసక్తికర కామెంట్స్​ చేశారు. పేదవాళ్లకు అందుబాటులో ఉండేలా సినిమా టికేట్ల ధరలు తగ్గిస్తే తప్పేంటని ప్రశ్నించారు. "సినిమా హీరోలు, దర్శకులు, నిర్మాతలకు ఆంధ్రప్రదేశ్​ ఉందని గుర్తుందా..? సినిమా వాళ్ల పొట్ట కొట్టామంటున్నారు చంద్రబాబు.. మరి పెద్దహీరోల సినిమాలు వస్తే భారీ ధరలకు బ్లాక్​లో టికెట్లు అమ్మటం గురించి మాట్లాడరెందుకు..? తొమ్మిదేళ్లు ఉమ్మడి రాష్ట్రంలో, ఐదేళ్లు ఏపీలో సీఎంగా ఉన్నా.. సినిమా టికెట్ల విషయం పట్టించుకోలేదు. మీ కమ్యూనిటీ వాళ్లు సినిమాల్లో ఉన్నారు కాబట్టే.. మద్దతు ఇచ్చి వాళ్లు బలిసేలా చేశావు." అంటూ విమర్శలు చేశారు. వైకాపా ఎమ్మెల్యే ప్రసన్నకుమార్​రెడ్డి చేసిన వ్యాఖ్యలపై తమ్మారెడ్డి తీవ్రంగా స్పందించారు.

ఎమ్మెల్యే వ్యాఖ్యలపై తమ్మారెడ్డి ఏమన్నారంటే..

"ఎవరికి బలిసింది సార్​.. ఎక్కడ బలిసింది సార్​.. ఎట్లా బలిసింది సార్​.. ఎవరి బలుపు చూసి మాట్లాడుతున్నారు సార్​. ఎవరి కులాన్ని గురించి మాట్లాడుతున్నారు. సామాజిక వర్గాల ప్రస్తావన మీరు తీసుకొచ్చారు కాబట్టి చెబుతున్నా. ఇండస్ట్రీలో టాప్​ ప్రొడ్యూసర్లలో ఇద్దరు మీ సామాజికవర్గమే. కుల ప్రస్థావన లేకుండా ఉపాధి కల్పించే ఏకైక పరిశ్రమ సినీ పరిశ్రమ. సామాజిక వర్గాల పేరుతో రాద్ధాంతం ఎందుకు..? ఎవరిని మెప్పిద్దామని కులాల ప్రస్తావన తీసుకొస్తున్నారు..? ఎవరి మెప్పు పొందేందుకు బలుపు అంటూ మాట్లాడుతున్నారు. ఎవరిని అవమానపరుద్దమనుకుంటున్నారు..? సినిమాపై డబ్బు పెట్టి.. యూనిట్​ అంతా కష్టపడి మంచి ప్రొడక్ట్​ను జనాల్లోకి తీసుకొస్తున్నాం. మీలాగా.. దేశాన్ని దోచుకోవట్లేదు. కోట్లు పెట్టి... రూపాయిలు ఏరుకుంటున్నాం. మీరు మాత్రం రూపాయి పెట్టి కోట్లు కొల్లగొడుతున్నారు. మీ ఎమ్మెల్యేలు ఎంత తింటున్నారో బహిరంగ చర్చకు సిద్ధమా..? మీరు వచ్చినప్పుడు మీ ఆస్తులెంతా..? ఇప్పుడెంత..? సినీ పరిశ్రమ అంటే నిర్మాతల మండలి. హీరోలంతా కూడా నిర్మాతలయ్యారు. ఇక్కడ ఎవడు ఎవడికి భయపడడు. అసలు ఎందుకు భయపడాలి. బలిశారు అనడానికి మీరెవరు..? మీ బలుపు మీరు చూసుకోండి. ఇంకెప్పుడు రాజకీయ నాయకులు బెదిరింపులకు పాల్పడొద్దని సవినయంగా మనవి చేసుకుంటున్నా." - తమ్మారెడ్డి భరద్వాజ, సినీ నిర్మాత, దర్శకుడు

ఇదీ చదవండి