తిరుపతి ఉప ఎన్నిక ప్రచారంలో భాగంగా తెదేపా అధినేత చంద్రబాబు ఆంధ్రప్రదేశ్లోని నెల్లూరు జిల్లా సర్వేపల్లి నియోజకవర్గం పొదలకూరులో రోడ్‌షోలో నిర్వహించారు. అనంతరం జరిగిన బహిరంగ సభలో మాట్లాడారు.
‘25 మంది ఎంపీలను గెలిపిస్తే.. కేంద్రం మెడలు వంచి ప్రత్యేకహోదా సాధిస్తానని చెబితే.. ప్రజలు నమ్మారు. అధికారంలోకి వచ్చిన రెండేళ్లలో ఒక్కసారైనా ఆ ప్రస్తావన తెచ్చారా? ప్రత్యేక హోదాను ఎందుకు తీసుకురాలేదో ప్రజలకు మీరు తిరుపతి వేదికగా చెప్పాలి. తిరుపతి లోక్‌సభ ఎన్నికల్లో తెదేపా గెలిస్తే.. నేనేమీ ముఖ్యమంత్రిని కాను. పనబాక లక్ష్మిని గెలిపిస్తే.. మా ప్రభుత్వం అధికారంలోకి రాదు. ముగ్గురికి మరొకరు తోడవుతారు. కానీ, నేను ప్రచారానికి వచ్చింది వైకాపాకు ఎందుకు ఓటేయకూడదో చెప్పడానికే. వైకాపా అధికారంలోకి వచ్చిన రెండేళ్లలో మీ కుటుంబ పరిస్థితి ఏంటో ఒక్కసారి ఆలోచించండి. ఆ పార్టీని ఓడించాలని ఒక్కొక్కరు పది మందికి చెప్పండి. ఆ పది మంది వంద మందికి చెబుతారు. అప్పుడే ఆకాశంలో ఉన్న జగన్‌మోహన్‌రెడ్డి నేల మీదకు వస్తారు. మిగిలిన మూడేళ్లయినా ప్రజల కష్టాలు పట్టించుకుంటారు. తిరుపతి ఉప ఎన్నికల్లో వైకాపాను ఓడించి.. జగన్‌కు గుణపాఠం చెప్పండి’
- చంద్రబాబు
నిత్యావసరాల ధరలు ఏపీలోనే ఎక్కువగా ఉన్నాయని.. జగన్‌ విద్యుత్తు ఛార్జీలు, ఆర్టీసీ, ఆస్తి పన్నులను పెంచారని చంద్రబాబు ఆరోపించారు.
‘వైకాపా ఎమ్మెల్యేలు రౌడీల్లా వ్యవహరిస్తున్నారు. ప్రశ్నించిన వారిపై కేసులు పెడుతున్నారు. వైకాపా నాయకులేమీ పైనుంచి దిగిరాలేదు. మీరు ఓట్లేస్తేనే గెలిచారు. ఇప్పుడు మీరే తెదేపాకు ఓటేసి.. రాష్ట్రాన్ని కాపాడాలి. మాకెందుకులే అని ప్రజలు ఇళ్లల్లో కూర్చుంటే కొంపలు మునుగుతాయి. చిన్నచిన్న పనులు చేసిన కాంట్రాక్టర్లకు రెండేళ్లుగా డబ్బు ఇవ్వకుండా ఇబ్బంది పెడుతున్నారు. తెదేపా వచ్చాక వారు ఎక్కడుంటారో తెలుసుకోవాలి’
- చంద్రబాబు
ఇవీచూడండి: హైదరాబాద్‌లో వ్యాపారుల స్వచ్ఛంద బంద్
