Kishan Reddy on Bandi Sanjay Arrest : భాజపా నేతలను కేసీఆర్ సర్కార్ అక్రమ కేసులతో వేధిస్తోందని కేంద్ర మంత్రి కిషన్ రెడ్డి ఆరోపించారు. కొవిడ్‌ నిబంధనల సాకుతో తప్పుడు కేసులు పెట్టారని ఆగ్రహం వ్యక్తం చేశారు. కరోనా నిబంధనలు భాజపా భవనానికి మాత్రమే వర్తిస్తాయా అని ప్రశ్నించారు. ఏ ప్రాతిపదికన భాజపా కార్యాలయంపై పోలీసులు దాడి చేశారని నిలదీశారు.
ఇందుకోసమే ఉద్యమం చేశామా?
BJP on Bandi Sanjay Arrest : అక్రమ కేసులకు భాజపా భయపడదని కిషన్ రెడ్డి స్పష్టం చేశారు. 'ధర్నాచౌక్‌లో సీఎం ఆందోళన చేయవచ్చు.. ప్రతిపక్షాలు చేయకూడదా?' అని ప్రశ్నించారు. తెలంగాణ ఉద్యమ సమయంలోనూ ఇంత అణచివేత లేదని అన్నారు. ఇలాంటి రాచరిక, నియంతృత్వ పాలన కోసమే ఉద్యమం చేశామా? అని అడిగారు. దిల్లీలో ఏడాదిపాటు రైతులు ఉద్యమం చేసినా కేంద్రం అడ్డుకోలేదన్న కిషన్ రెడ్డి.. కేసీఆర్ ప్రభుత్వంపై రాజీలేని పోరాటం చేస్తామని తెలిపారు.
బండి సంజయ్కు కిషన్ రెడ్డి పరామర్శ..
Kishan Reddy Met Bandi Sanjay in Jail : అంతకుముందు.. కరీంనగర్‌ జైలులో ఉన్న భాజపా రాష్ట్ర అధ్యక్షుడు బండి సంజయ్ను కేంద్రమంత్రి కిషన్ రెడ్డి పరామర్శించారు. హైదరాబాద్‌ నుంచి ఎమ్మెల్యే ఈటలతో కలిసి కరీంనగర్‌కు వెళ్లారు. అనంతరం సంజయ్ కార్యాలయాన్ని పరిశీలించారు. జాగరణ దీక్ష అరెస్ట్‌ సమయంలో పోలీసులు ప్రవర్తించిన తీరును శ్రేణులను అడిగి తెలుసుకున్నారు. సంజయ్ కుటుంబసభ్యులను పరామర్శించారు. పోలీసుల లాఠీఛార్జీలో గాయపడిన వారి యోగక్షేమాలు తెలుసుకున్నారు.
కేసీఆర్ సమాధానం చెప్పాలి..
'బదిలీల జీవో 317 ను సవరించాలని ఉద్యోగ ఉపాధ్యాయ సంఘాలు పోరాడుతున్నాయి. మద్దతు తెలపాలని వారు మమ్మల్ని కోరారు. అందుకే భాజపా తరఫున బండి సంజయ్ జాగరణ పేరుతో దీక్ష చేపట్టారు. కరోనా నిబంధనలతోనే దీక్ష ప్రారంభించారు. కానీ పోలీసుల అడ్డంకితో అంతా గందరగోళంగా మారింది. ఇది భాజపా కార్యాలయం.. ఈ భవనానికి సీఎం కేసీఆర్ కిరాయి కట్టడం లేదు. ఎవరి దయాదాక్షిణ్యాలతో ఈ భవనం నడవడం లేదు. ఓ ఎంపీ కార్యాలయంపై పోలీసుల దాష్టీకం ఏంటో అర్థం కావడం లేదు. ఈ అమర్యాదపూర్వక ఘటనకు కేసీఆర్ సమాధానం చెప్పాలి.' - కిషన్ రెడ్డి, కేంద్ర మంత్రి
ప్రజాక్షేత్రంలో తేల్చుకుంటాం..
Kishan Reddy Comments on TRS Government : భాజపా నేతలపై ఎన్ని అక్రమ కేసులు పెట్టినా.. కోర్టులో తమకు న్యాయం జరుగుతుందనే నమ్మకం ఉందని కిషన్ రెడ్డి ధీమా వ్యక్తం చేశారు. రాష్ట్ర ప్రభుత్వ ప్రజా వ్యతిరేక విధానాలు.. వైఫల్యాలను కచ్చితంగా ఎండగడతామని చెప్పారు. ఎన్నో ప్రభుత్వాలను చూశామన్న కిషన్ రెడ్డి.. ఏ ప్రభుత్వం.. ఏ నియంత.. ప్రజల ముందు ఎక్కువ కాలం నిలబడటం చూడలేదని తెలిపారు. బండి సంజయ్పై పెట్టిన అక్రమ కేసులను ఖండిస్తున్నట్లు స్పష్టం చేశారు. ఇటు న్యాయపరంగా.. అటు ప్రజాక్షేత్రంలో తేల్చుకుంటామన్నారు.
మా పోరాటం ఆగదు..
Kishan Reddy Fires on Sanjay Arrest :లోక్సభలో ప్రివిలేజ్ కమిటీ, మానవ హక్కుల వేదికలతో పాటు అన్ని వేదికలను ఉపయోగించి పోరాటం చేస్తామని కేంద్ర మంత్రి కిషన్ రెడ్డి స్పష్టం చేశారు. 317జీవోపై భాజపా పోరాటం కొనసాగుతుందని తెలిపారు. ఆ జీవోను ఉపసంహరించుకుని ఆమోదయోగ్యమైన మరో జీవోను తీసుకువచ్చే వరకు తమ ఉద్యమం ఆగదని చెప్పారు. బండి సంజయ్పై జరిగిన దాడి.. అరెస్టు.. జైలు అంశాలను కేంద్ర పెద్దలతో చర్చించామని వెల్లడించారు.
సంజయ్పై దాడి.. హేయమైన చర్య..
Etala Rajender on Bandi Sanjay Arrest :శాంతియుతంగా ధర్నా చేసినా.. దాడి చేయడం అత్యంత హేయమైన చర్య అని హుజూరాబాద్ ఎమ్మెల్యే ఈటల రాజేందర్ అన్నారు. రాష్ట్రంలో ప్రజాస్వామ్యం ఖూనీ అయిందని వాపోయారు. ఉద్యోగ ఉపాధ్యాయ బదిలీలతో భర్త ఓ ఊళ్లో.. భార్య మరో ఊళ్లో పిల్లలు ఇంకో ఊళ్లో ఉంటూ.. కుటుంబాలు చెల్లాచెదురవుతున్నాయని ఆవేదన వ్యక్తం చేశారు. ఇలా ఉద్యోగుల ఇబ్బందులపై గళమెత్తిన బండి సంజయ్ను అరెస్టు చేయడం దారుణని పేర్కొన్నారు.
ప్రజల పక్షానే పోరాటం..
'కరోనా నిబంధనల మధ్యే బండి సంజయ్ దీక్ష చేపట్టారు. కానీ .. ముఖ్యమంత్రి ఆదేశాల మేరకు పోలీసులు ఆయనతో నీచంగా ప్రవర్తించారు. కానిస్టేబుల్ నుంచి సీపీ వరకు అందరి పని సీపీయే చేశారు. మమ్మల్ని ఇబ్బంది పెడితే పెట్టారు కానీ.. ఉద్యోగ ఉపాధ్యాయులకు అన్యాయం చేయకండి. ప్రభుత్వం దిగి వచ్చే వరకు ప్రజల పక్షాన నిలబడి పోరాటం చేస్తాం.' - ఈటల రాజేందర్, హుజూరాబాద్ ఎమ్మెల్యే
