జాగాలపై డేగలు.. రాజధాని శివార్లలో బై నంబర్ల దందా

రాజధాని శివార్లలో బై నంబర్ల దందా నడుస్తోంది. పాత వెంచర్లలో హద్దులు నిర్ణయించని స్థలాలపై కన్ను వేస్తున్నారు. ఫలితంగా న్యాయ వివాదాలను సృష్టిస్తున్నారు. హైదరాబాద్ శివార్లలోని రియల్ ముఠాల దందపాపై ప్రత్యేక కథనం.

రాజేంద్రనగర్‌ బుద్వేల్‌లోని న్యూగ్రీన్‌సిటీ కాలనీలో 529 సర్వే నంబర్‌లో ఓ వ్యక్తి తన భార్య పేరిట 200 చదరపు గజాల స్థలం కొన్నారు. 1997లో రిజిస్టర్డ్‌ సేల్‌డీడ్‌ ద్వారా కొనుగోలు చేసిన ఆ స్థలానికి 2008లో ఎల్‌ఆర్‌ఎస్‌కు దరఖాస్తు చేసి.. రుసుం చెల్లించారు. 2009లో జీహెచ్‌ఎంసీ నుంచి ఇంటి నిర్మాణానికి అనుమతి తీసుకున్నారు. స్థలం చుట్టూ ప్రహరీ నిర్మించుకున్నారు. 2018లో మరో వ్యక్తి కోర్టు నోటీస్‌ పంపారు. ఆ స్థలాన్ని 2018లో కొనుగోలు చేశానని.. రాజేంద్రనగర్‌ సబ్‌రిజిస్ట్రార్‌ కార్యాలయంలో తన పేరిట రిజిస్ట్రేషన్‌ జరిగిందని అందులో పేర్కొన్నారు. ఆ వ్యక్తి స్థలం వద్ద బోర్డు పెట్టేందుకు యత్నించడంతో గత నెల 18న రాజేంద్రనగర్‌ పోలీస్‌ స్టేషన్‌లో బాధితుడు ఫిర్యాదు చేశారు. కేసు నమోదు చేసిన పోలీసులు దర్యాప్తు చేస్తున్నారు. రాజధానితోపాటు శివారు ప్రాంతాల్లో భూముల విలువలు పెరగడంతో తరచూ వివాదాలు చోటుచేసుకుంటున్నాయి. పలువురు వ్యక్తులు ముఠాలుగా ఏర్పడి విలువైన స్థలాలపై కన్నేస్తున్నారు. న్యాయవివాదాలను సృష్టించి.. స్థలాలను కాజేసేందుకు కుయుక్తులు పన్నుతున్నారు.

బైనంబర్లతో రిజిస్ట్రేషన్‌ అయిన భూముల పత్రాలతో..
రాజధాని శివార్లలో రెండున్నర దశాబ్దాల క్రితం వరకు భూముల విలువ సాధారణంగానే ఉండేది. ఉమ్మడి రంగారెడ్డి జిల్లాలో స్థిరాస్తి వ్యాపారం అప్పుడప్పుడే ఊపందుకోవడంతో పలు సంస్థలు రైతుల నుంచి భూములు కొనుగోలు చేసి.. వాటిలో హుడా లేఅవుట్ల ద్వారా వెంచర్లు వేశాయి. అయితే చాలా వెంచర్లలో పక్కాగా సర్వే చేసి హద్దులు నిర్ణయించలేదు. గతంలో పలు స్థిరాస్తి వెంచర్లకు తమ స్థలాల్లో కొంత విక్రయించిన భూయజమానులు.. మిగిలిన స్థలాలను తమ వద్దే ఉంచేసుకున్నారు. ఇప్పుడు వాటిని విక్రయిస్తుండటంతో రిజిస్ట్రేషన్‌ కార్యాలయాల్లో బైనంబర్లతో రిజిస్ట్రేషన్లు చేస్తున్నారు. ఆ భూములపై వివాదాలొస్తాయంటూ యజమానుల నుంచి ముఠా సభ్యులు తక్కువ ధరకే కొంటున్నారు. లేదా వాటాలు మాట్లాడుకొంటున్నారు. భైనంబర్లతో రిజిస్ట్రేషన్‌ అయిన భూముల పత్రాలు(డాక్యుమెంట్లు) సమకూర్చుకుని.. పోలీసులను ఆశ్రయిస్తున్నారు. వారు సహకరిస్తే వెంచర్లలో భూములు కొన్నవారిపై బెదిరింపులకు పాల్పడుతున్నారు. గతంలో సర్వే చేయలేదు కాబట్టి వివాదాలు వస్తాయంటూ భయపెట్టి.. బలవంతంగా తక్కువ ధరకు కొంటున్నారు. వారు అమ్మేందుకు ఇష్టపడకపోతే న్యాయవివాదాలు సృష్టిస్తున్నారు. ఇలాంటి ఓ వెంచర్‌ వివాదంలోనే కొద్దిరోజుల క్రితం ఇబ్రహీంపట్నంలో జరిగిన కాల్పుల్లో ఇద్దరు హత్యకు గురికావడం సంచలనం సృష్టించింది.

ఎస్‌వోపీనీ అడ్డం పెట్టుకొని..
స్థిరాస్తి వ్యాపారంలో సివిల్‌ తగాదాలకు సంబంధించి రాష్ట్రంలో ప్రామాణిక కార్యాచరణ విధానం(ఎస్‌వోపీ) అమల్లో ఉంది. క్షేత్రస్థాయిలో పోలీసులు సివిల్‌ వివాదాల్లో జోక్యం చేసుకుంటే అక్రమాలకు ఆస్కారముంటుందనే ఉద్దేశంతో ఉన్నతాధికారులు దీన్ని ప్రవేశపెట్టారు. ఈ విధానాన్ని సైతం ముఠాలు తమకు అనుకూలంగా మలచుకుంటున్నాయి. ఒకవేళ ముఠాలది అక్రమమేనని భావించి పోలీసులు ఠాణాకు పిలిపిస్తే సివిల్‌ వివాదం కాబట్టి న్యాయస్థానంలో తేల్చుకుంటామని తెగేసి చెబుతున్నారు. ఈక్రమంలో న్యాయస్థానాల చుట్టూ తిరగలేక చాలామంది బాధితులు ఎంతో కొంత తీసుకొని ముఠాలకు స్థలాలను అప్పగించేయాల్సిన పరిస్థితి ఏర్పడుతోంది. స్థలాల్లో ఇప్పటికే ఇళ్లు కట్టుకున్నవారూ ఎంతోకొంత ముట్టజెప్పాల్సి వస్తోంది.

డాక్యుమెంట్లలో లోపాలే ఆసరాగా..
భూవివాదాల ఆనుపానులు తెలిసిన ముఠాలు పాత వెంచర్లను వెతికి మరీ వివాదాలను తెరపైకి తెస్తున్నాయి. 1996 వరకు రిజిస్ట్రేషన్‌ డాక్యుమెంట్లలో విక్రేతలు, కొనుగోలుదారుల ఫొటోలు ఉండేవి కావు. దీన్ని ఆసరాగా చేసుకుని రెచ్చిపోతున్నారు. అసలు యజమానుల సంతకాలను ఫోర్జరీ చేసి.. ఆ స్థలాలను తాము గతంలోనే కొన్నట్లు పత్రాలను సృష్టిస్తున్నారు. వాటి ఆధారంగా న్యాయస్థానాల్లో వ్యాజ్యాలు వేస్తున్నారు. అలాంటి వివాదాలు ఏళ్ల తరబడి కొలిక్కి రాకపోవడంతో బాధితులు తమ దారికి వస్తారనే ధీమాతో ముఠాలు ఆగడాలకు పాల్పడుతున్నాయి.

ఇదీ చదవండి: Jubilee hills case: మైనర్లకు ఐదు రోజుల కస్టడీ.. సాదుద్దీన్​ను ఐదుగంటల పాటు ప్రశ్నించిన పోలీసులు