ఆంధ్రప్రదేశ్ విజయనగరం జిల్లా భోగాపురంలో ప్రాంతీయ ఆసుపత్రిలో కరెంటు లేకపోవడంతో కాన్పు కోసం వచ్చిన గర్భిణీకి చీకటిలో సిబ్బంది వైద్యం అందించారు. రెండు రోజులుగా కురిసిన వర్షాలతో ఆసుపత్రిలో విద్యుత్ సరఫరా నిలిపివేయడమే ఇందుకు ప్రధాన కారణం. పలుమార్లు జాతీయ, రాష్ట్ర స్థాయిలో అవార్డులు అందుకున్న ఈ ఆసుపత్రి.. నేడు అంధకారంగా మారింది.
ఆసుపత్రికి అవార్డులతో పాటు లక్షల్లో రివార్డులు వస్తున్న అవన్నీ పక్క దారి పట్టిస్తున్నారని.. అవసరమైన మౌలిక సదుపాయాలపై దృష్టి సారించడం లేదని స్థానికులు ఆరోపిస్తున్నారు. ఆసుపత్రిలో రూ.15 లక్షల విలువైన జనరేటర్ రెండేళ్ల క్రితమే అమర్చారని.. కానీ ఇది పాడై నాలుగు నెలలు కావస్తున్నా ఎవరూ పట్టించుకోలేదని వారు ఆగ్రహం వ్యక్తం చేస్తున్నారు. ఇప్పటికైనా అధికారులు స్పందించి విద్యుత్ సరఫరాను పునరుద్ధరించాలని కోరుతున్నారు.
ఇవీ చదవండి: రారండోయ్‌.. నిమజ్జనం చూద్దాం.. భక్తితో తరిద్దాం..!!
