ఓటర్ల జాబితా పరిశీలన వేగవంతం లోక్సభ ఎన్నికల దృష్ట్యా నగరంలో ఓటర్ల జాబితా పరిశీలన వేగవంతం చేసినట్లు జీహెచ్ఎంసీ కమిషనర్, హైదరాబాద్ జిల్లా ఎన్నికల అధికారి దానకిశోర్ తెలిపారు. ఫిబ్రవరి 22న తుది జాబితా ప్రకటిస్తామని స్పష్టం చేశారు. జనవరి 1 నాటికి 18 ఏళ్లు నిండిన ప్రతి ఒక్కరు సోమవారం సాయంత్రంలోగా దరఖాస్తు చేసుకోవాలని సూచించారు. జీహెచ్ఎంసీ ప్రధాన కార్యాలయంలో వివిధ రాజకీయ పార్టీలతో సమావేశమయ్యారు. ఇప్పటి వరకు 1.47 లక్షల మంది కొత్త ఓట్లు వచ్చాయని, 28,500లకు పైగా ఓట్లను తొలగించినట్లు వెల్లడించారు. రేపటి నుంచి ఈవీఎంల ప్రాథమిక పరిశీలన ఉంటుందని వివరించారు. ఎన్నికల కేసు నడుస్తున్న 5 నియోజకవర్గాల్లో మినహాయించి మిగతా 14 నియోజకవర్గాల్లో ఈవీఎంలను పరిశీలిస్తామన్నారు. ఇందుకోసం ముగ్గురు నోడల్ అధికారులను నియమించినట్లు పేర్కొన్నారు. గతంలో తొలగించిన పేర్లను పరిశీలించి జాబితా రూపొందిస్తామని దానకిశోర్ తెలిపారు.
