సామాజిక మాధ్యమ సంస్థ ట్విట్టర్లో ఉద్యోగాల కోత కొనసాగుతోంది. ఇప్పటికే ట్విట్టర్లో పనిచేస్తున్న 3వేల 700 మంది ఉద్యోగులను తొలగించిన ఆ సంస్థ.. తాజాగా మరికొందరికి ఉద్వాసన పలికింది. ట్రస్ట్‌ అండ్‌ సేఫ్టీ విభాగంలో పనిచేస్తున్న ఉద్యోగులను తొలగిస్తున్నట్లు వెల్లడించింది. విశ్వసనీయ వర్గాల సమాచారాన్ని ఉటంకిస్తూ బ్లూమ్ బర్గ్‌ ఈ విషయం వెల్లడించింది. డబ్లిన్‌, సింగపూర్‌లోని కార్యాలయాల్లో పనిచేస్తున్న సుమారు డజను మందికిపైగా ఉద్యోగులను శుక్రవారం రాత్రి తొలగించినట్లు అంతర్జాతీయ మీడియా తెలిపింది. ఈ వార్తలను ట్విట్టర్ ట్రస్ట్‌ అండ్‌ సేఫ్టీ వైస్‌ ప్రెసిడెంట్ ఎల్లా ఇర్విన్ ధ్రువీకరించినట్లు వెల్లడించింది. అయితే తొలగించిన ఉద్యోగుల వివరాలను ఇర్విన్ తెలియజేయలేదు. ట్రస్ట్‌ అండ్‌ సేఫ్టీ విభాగంలో కొందరినే తొలగించామని.. అయితే ఈ విభాగంలో వేలాది మంది పనిచేస్తున్నారని ఇర్విన్ చెప్పినట్లు సమాచారం.
ట్విట్టర్‌ను ఎలాన్ మస్క్ హస్తగతం చేసుకున్నప్పటి నుంచి ఉద్యోగాల కోతలు మొదలయ్యాయి. వ్యయ నియంత్రణ, ట్విట్టర్ అభివృద్ధి కోసమే ఇలాంటి నిర్ణయాలు తీసుకోక తప్పడం లేదని ఇప్పటికే ఆ సంస్థ ప్రకటించింది. గత నవంబరులో దాదాపు 3వేల 700 మంది ఉద్యోగులకు ట్విట్టర్ ఉద్వాసన పలికింది. వీరిలో భారత్‌లో పనిచేస్తున్న వారు 250 మంది ఉన్నారు.
