SBI Standalone Net Profit : భారతదేశంలోనే అత్యంత పెద్ద ప్రభుత్వ రంగ బ్యాంకు ఎస్బీఐ ఈ ఏడాది భారీ లాభాలను నమోదు చేసింది. 2023 జూన్ నెలతో ముగిసిన మొదటి త్రైమాసికంలో రూ.16,884 కోట్ల స్టాండ్అలోన్ నెట్ ప్రాఫిట్ను సంపాదించింది. ఇది గతేడాదితో పోల్చితే రెండు రెట్లు లాభం కావడం విశేషం. 2022-23 ఏప్రిల్-జూన్ త్రైమాసికంలో ఎస్బీఐ స్టాండ్అలోన్ నెట్ ప్రాఫిట్ కేవలం రూ.6,068 మాత్రమే. వాస్తవానికి మొండి బాకాయిలు తగ్గుముఖం పట్టడం, రుణాలపై వచ్చే వడ్డీ ఆదాయం మెరుగుపడడమే ఎస్బీఐ లాభాలకు కారణం.
లాభాలు రెట్టింపు!
SBI Consolidated Profit : ఎస్బీఐ ఏకీకృత లాభం కూడా దాదాపు రెండు రెట్లు పెరిగింది. గతేడాది ఏప్రిల్-జూన్ మాసాల్లో ఎస్బీఐ కన్సాలిడేటెడ్ ప్రోఫిట్ రూ.7,325 కోట్లు ఉండగా, ఈ సంవత్సరం అది రూ.18,537 కోట్లకు పెరిగింది. తాజాగా ఎస్బీఐ తన రెగ్యులేటరీ ఫైలింగ్లో ఈ విషయాన్ని స్పష్టం చేసింది.
ఎస్బీఐ మొత్తం లాభం
SBI Total Income : 2022-23 ఆర్థిక సంవత్సరంలో స్టేట్ బ్యాంక్ ఆఫ్ ఇండియా మొత్తం ఆదాయం రూ.74,989 కోట్లు, కానీ ఈ 2023-24 ఆర్థిక సంవత్సరంలో ఎస్బీఐ మొత్తం ఆదాయం ఏకంగా రూ.1,08,039 కోట్లకు చేరింది.
వడ్డీ ఆదాయం పెరిగింది!
SBI Interest Income : ఈ ఏడాది ఎస్బీఐకు వడ్డీ ఆదాయం రూ.95,975 కోట్లు వచ్చింది. గతేడాది ఈ ఇంట్రెస్ట్ ఇన్కం కేవలం రూ.72,676 కోట్లు మాత్రమే కావడం గమనార్హం.
నిరర్థక ఆస్తులు (NPA)
SBI Non performing Assets (NPA) : ఎస్బీఐ స్థూల నిరర్థక ఆస్తులు (NPA) జూన్ చివరి నాటికి 2.76 శాతానికి పడిపోయాయి. గతేడాది ఇదే కాలంలో ఎస్బీఐ ఎన్పీఏలు 3.91 శాతంగా ఉన్నాయి. అదే విధంగా నికర ఎన్పీఏలు కూడా 2023 జూన్లో 0.71 శాతానికి తగ్గాయి. గతేడాది ఈ నికర ఎన్పీఏలు దాదాపు 1 శాతం వరకు ఉండేవి.
ఎస్బీఐ జనరల్ ఇన్సూరెన్స్!
SBI General Insurance : 2023 జూన్ త్రైమాసికంలో ఎస్బీఐ తన నాన్-లైఫ్ ఇన్సూరెన్స్ వెంచర్.. జనరల్ ఇన్సూరెన్స్లో రూ.489.67 కోట్లను ఇన్ప్యూజ్ చేసింది. ముఖ్యంగా 8 ప్రాంతీయ గ్రామీణ బ్యాంకుల్లో (RRB)ల్లో రూ.82.16 కోట్లను జమ చేసినట్లు స్పష్టం చేసింది.
