PPF Deposit Date for Full Month Interest: ప్రజా భవిష్య నిధి (పీపీఎఫ్).. పెట్టుబడి, రాబడికి ప్రభుత్వ హామీ ఉండే.. ఈ పథకం ఎంతోమందిని ఆకర్షిస్తుంది. దీర్ఘకాలిక లక్ష్యాల సాధనలో ఇది ఎంతో కీలకం. ఒకేసారి లేదా నెలనెలా ఇందులో జమ చేసేందుకు వెసులుబాటు ఉంటుంది. ఈ ఖాతాలో ఒక ఆర్థిక సంవత్సరంలో రూ.1,50,000 వరకూ జమ చేసేందుకు అవకాశం ఉంది. పెట్టిన మొత్తానికి సెక్షన్‌ 80సీ నిబంధనల మేరకు పన్ను మినహాయింపు లభిస్తుంది. ఈ పథకం వ్యవధి 15 ఏళ్లు. ఆ తర్వాత అయిదేళ్ల చొప్పున రెండుసార్లు పొడిగించుకునే వీలూ ఉంది. అంటే మొత్తం 25 ఏళ్ల పాటు పెట్టుబడిని కొనసాగించవచ్చు. వచ్చిన వడ్డీపై ఎలాంటి పన్ను భారం ఉండదు.
ఇన్ని ప్రయోజనాలున్న ఈ ఖాతాలో చాలామంది ఆర్థిక సంవత్సరం చివరకు వచ్చాక.. పన్ను మినహాయింపు కోసం మదుపు చేస్తుండటం చూస్తూనే ఉంటాం. కానీ, ఇది సరైన పద్ధతి కాదు. ఒకేసారి పీపీఎఫ్ ఖాతాలో జమ చేయాలనుకున్న వారు.. ఆర్థిక సంవత్సరం ప్రారంభంలోనే అంటే.. ఏప్రిల్ 1 నుంచి 4 మధ్య పెట్టుబడి పెట్టాలి. నెలనెలా జమ చేసేవారూ 5వ తేదీకి ముందే ఆ పని పూర్తి చేయాలి.
కారణం ఏమిటంటే..
పీపీఎఫ్ నిబంధనల ప్రకారం నెలలోని 5వ తేదీ, చివరి రోజు మధ్య ఉన్న కనీస నిల్వ మొత్తంపైనే వడ్డీ లెక్కిస్తారు. అందుకే, అయిదో తేదీ లోపే జమను పూర్తి చేస్తే ఆ నెలలో చెల్లించిన మొత్తంపైనా వడ్డీ లభిస్తుంది. నెలనెలా వడ్డీ గణించినప్పటికీ.. ఆర్థిక సంవత్సరం ముగింపులోనే అసలులో కలుపుతారు. కాబట్టి, అధిక రాబడి కోసం ప్రతి నెలా 1-4 తేదీల్లోపే పీపీఎఫ్లో మీరు అనుకుంటున్న మొత్తాన్ని డిపాజిట్‌ చేయాలి. ప్రస్తుతం పీపీఎఫ్లో 7.1 శాతం వార్షిక వడ్డీ అందుతోంది.
ఇదీ చూడండి: ఈపీఎఫ్‌కు మార్కెట్‌ అండ- ఈక్విటీలపై మెరుగైన లాభాలు
