కరోనా అనంతరం చాలా మంది సొంత వాహనాల్లో ప్రయాణం చేసేందుకే ప్రాధాన్యం ఇస్తున్నారు. రోడ్లపై వాహనాల సంఖ్య సైతం పెరుగుతోంది. దీంతో రోడ్డు ప్రమాదాలు కూడా ఎక్కువగానే జరుగుతున్నాయి. ఈ అనుకోని దుర్ఘటనల నుంచి మనల్ని మనం ఆర్థికంగా రక్షించుకోవాలి. అదే విధంగా కుటుంబానికి కూడా భరోసా కల్పించాలి. ఇలాంటి సందర్భాల్లో ఉపయోగపడేదే వ్యక్తిగత ప్రమాద బీమా పాలసీ. ఏదైనా అనుకోని ఆపద వచ్చినప్పుడు ఇది ఆర్థికంగా మనకు రక్షణనిస్తుంది.
వాహనాల్లో ప్రయాణించేటప్పుడు అనుకోని ప్రమాదం ఎదురవ్వవచ్చు. వాహనంలో ఉన్న ప్రయాణికులు చనిపోవచ్చు. పూర్తిగా వైకల్యానికి గురి కావచ్చు. పాక్షిక వైకల్యం కలగవచ్చు. ఇలాంటి ఆపద సమయాల్లో వ్యక్తిగత ప్రమాద బీమా.. సంభవించిన నష్టంలో ఆర్థిక అంశాలను చూసుకుంటుంది. ప్రధానంగా ప్రమాదం వల్ల పాలసీదారుడికి ఏదైనా జరిగితే.. కుటుంబానికి ఆర్థిక చిక్కులు ఎదురవ్వకుండా భరోసా కల్పిస్తుంది. ఈ వ్యక్తిగత ప్రమాద బీమా పాలసీని కొనుగోలు చేసేందుకు 18-65 సంవత్సరాల వారు అర్హులు.
ప్రమాదం జరిగిన అనంతరం వ్యక్తికి కొన్నాళ్లపాటు ఆదాయం ఆగిపోవచ్చు. చికిత్స ఖర్చు, ఈఎంఐలు, రుణాలు ఇతర అవసరాలు తీరేలా వ్యక్తిగత ప్రమాద బీమా పాలసీ నుంచి ఏక మొత్తంగా కొంత డబ్బు వస్తుంది. దాన్ని అవసరాలకు వినియోగించుకునే వెసులుబాటు ఉంటుంది. ఈ మధ్య బీమా కంపెనీలు సాహస విహార యాత్రలను కూడా ఈ పాలసీల పరిధిలోకి తీసుకొచ్చాయి.
మరణిస్తే..
ప్రమాదంలో పాలసీదారుడు మరణించినట్లయితే.. యాక్సిడెంటల్‌ డెత్‌ కవరేజీ కింద నామినీ లేదంటే చట్టబద్ధ వారసులకు హామీ మొత్తం అందుతుంది.
శాశ్వత పూర్తి వైకల్యం..
ఒకవేళ పాలసీదారుడికి వైకల్యం సంభవించి, ఇక ఏ చికిత్స ద్వారా అతను/ఆమె కోలుకోలేని పరిస్థితిలో ఉంటే.. పాలసీలో ఇచ్చిన హామీ మొత్తం చేతికి లభిస్తుంది. కొన్ని బీమా సంస్థలు హామీ మొత్తానికి రెట్టింపు సొమ్మును కూడా అందిస్తున్నాయి.
శాశ్వత పాక్షిక వైకల్యం..
ప్రమాదం వల్ల వ్యక్తికి శరీరంలో ఏదైనా భాగాన్ని, చూపు, వినికిడి కోల్పోవడం వంటి వాటితో బయటపడితే.. చికిత్సకు అయ్యే ఖర్చును పాలసీలోని నిబంధనల ప్రకారం చెల్లిస్తారు. వ్యక్తి పరిస్థితిని బట్టి, హామీ మొత్తంలో 25 నుంచి 90 శాతం వరకు పొందే అవకాశం ఉంటుంది.
తాత్కాలిక చికిత్స..
ఒక్కోసారి పెద్దగా గాయాలేమీ కానప్పటికీ.. ప్రమాదానికి గురైన వారిని వైద్యులు విశ్రాంతి తీసుకోమని సూచిస్తుంటారు. అలాంటప్పుడు సదరు వ్యక్తి ఆదాయం కోల్పోవచ్చు. అలాగే ఆ సమయంలో అయ్యే ఖర్చులకు డబ్బు సైతం అవసరం అవుతాయి. అవన్నీ కవర్‌ అయ్యేలా పాలసీలోని నిబంధనల ప్రకారం.. రోజూ లేదా వారం చొప్పున కొంత మొత్తాన్ని బీమా సంస్థ అందిస్తుంది.
