ప్రపంచ కుబేరుల్లో ఒకరు, ఆసియాలోనే అత్యంత ధనవంతుడు ముకేశ్ అంబానీ ఇంట్లో ఏ చిన్న కార్యక్రమం జరిగినా ప్రత్యేకంగానే ఉంటుంది. రిలయన్స్ ఫౌండేషన్ ఛైర్‌పర్సన్‌ నీతా అంబానీ కలల ప్రాజెక్ట్ 'నీతా ముకేశ్ అంబానీ సాంస్కృతి కేంద్రం(ఎన్ఎమ్ఏసీసీ)' గత శుక్రవారం ఘనంగా ప్రారంభమైంది. ఈ సంతోషాన్ని పురస్కరించుకుని అంబానీ కుటుంబం దేశంలోని వివిధ రంగాల ప్రముఖులకు ప్రత్యేక విందు ఏర్పాట్లు చేసింది. రాజకీయ, సినీ, క్రీడా ప్రముఖులకు ఈ విందుకు హాజరయ్యారు. అయితే ఈ విందులో అతిథులకు నోట్ల కట్టలను వచ్చించారు. నోట్ల కట్టలేంటీ.. తినడమేంటీ? అని అనుకుంటున్నారా.. వాటిని అలా ఎందుకు పెట్టారంటే..?
అంబానీ పార్టీలో విందులో డైనింగ్ టేబుళ్లపై నోట్ల కట్టలు ఉండటాన్ని చూసి కొందరు వ్యక్తులు ఆ ఫొటోలను సోషల్మీడియాలో షేర్ చేశారు. ప్రస్తుతం దీనికి సంబంధించిన ఫొటోలు నెట్టింట తెగ వైరల్ అవుతున్నాయి. అతిథులకు వడ్డించడానికి రెడీగా ఉంచిన ఓ డిజర్ట్‌ ఫొటో అది. గిన్నెలో ఆకు వేసి అందులో కొన్ని కరెన్సీ నోట్లు, వాటి పక్కనే స్వీట్లు పెట్టారు. సరిగ్గా గమనిస్తే అవి నిజమైన కరెన్సీ నోట్లు కాదని తెలుస్తుంది. ఆ ప్రత్యేక వంటకం కూడా దిల్లీలో లభించే చాలా పాపులర్‌ అయిన 'దౌలత్ కి చాట్' అనే నోరూరించే స్వీట్.
అసలేంటీ దౌలత్ కి చాట్..?
నోరూరించే ఈ రుచికరమైన వంటకం దిల్లీ సహా ఉత్తర భారత్‌లోని పలు ప్రాంతాల్లో లభిస్తుంది. అది కూడా కేవలం శీతాకాలంలో మాత్రమే రెండు నెలల పాటు దొరుకుతుంది. చిక్కటి పాల నుంచి తీసిన నురుగుతో దీన్ని తయారు చేస్తారు. ఈ స్వీటుపైన పిస్తా, కోవా, చక్కెర పొడి వేసి ఈ ప్రత్యేక వంటకాన్ని తయారు చేస్తారు. నాణ్యమైన ఆహార పదార్థాలతో దీన్ని తయారుచేయడం వల్ల దీన్ని 'దౌలత్ కి చాట్' అని పిలుస్తారు. ఈ స్పీట్ పేరులోనే సంపద ఉంది. దీంతో దిల్లీకి చెందిన 'ఇండియన్‌ అసెంట్‌' అనే రెస్టారంట్‌ ఈ డిజర్ట్‌తో పాటుగా నకిలీ కరెన్సీ నోట్లను దాని చుట్టూ పెట్టి విక్రయిస్తోంది. దీంతో ఈ వంటకం చాలా పాపులర్‌ అయ్యింది. ఆ ప్రత్యేక వంటకాన్నే అతిథులకు వడ్డించింది అంబానీ కుటుంబం. సోషల్ మీడియాలో ఈ ఫొటోలను చూసిన వారు.. తెగ కామెంట్లు చేస్తున్నారు.
దీంతో పాటుగా ఈ పార్టీకి విచ్చేసిన అతిథులకు అంబానీ కుటుంబం ఎన్నో ప్రత్యేక వంటకాలను వడ్డించినట్లు తెలుస్తోంది. వెండి కంచాల్లో విందు ఏర్పాట్లు చేశారు. ఈ విందు భోజనంలో పాలక్ పన్నీర్‌, పప్పు, కూర, రోటీ, హల్వా, డిజర్ట్‌, పాపడ్‌, లడ్డూ వంటి పలు రకాల భారతీయ సంప్రదాయ వంటకాలను కూడా వడ్డించినట్లు తెలుస్తోంది. గత శుక్రవారం నీతా అంబానీ కలల ప్రాజెక్ట్ 'నీతా ముకేశ్ అంబానీ సాంస్కృతి కేంద్రం' ప్రారంభమైంది. ఈ సందర్భంగా అంబానీ కుటుంబం మూడు రోజుల పాటు ప్రత్యేక వేడుకలు నిర్వహించింది. ఈ వేడుకలకు హాలీవుడ్‌, బాలీవుడ్ సినీ ప్రముఖులు, పలువురు రాజకీయ నేతలు, క్రీడారంగానికి చెందిన ప్రముఖులు హాజరయ్యారు.
