MRF stock price : ప్రముఖ టైర్ల తయారీ సంస్థ ఎంఆర్ఎఫ్ షేర్ ధర లక్ష రూపాయలు దాటింది. భారతదేశంలో రూ.1 లక్ష మార్క్ దాటిన తొలి స్టాక్గా ఇది చరిత్ర సృష్టించింది. మంగళవారం కంపెనీ షేర్ విలువ లక్ష రూపాయల మార్క్ను దాటి జీవనకాల గరిష్ఠాన్ని తాకింది.
చేరువగా వచ్చి.. వెనక్కి
గత నెలలోనే ఎంఆర్ఎఫ్ షేర్ దాదాపుగా రూ.1 లక్ష మార్క్కు చేరువగా వచ్చి, తరువాత వెనక్కిమళ్లింది. ప్యూచర్స్ మార్కెట్లో మాత్రం మే 8న ఈ కీలక మైలు రాయిన దాటి మదుపరుల్లో మరింత ఆత్రుతను పెంచింది. మంగళవారం ఎన్ఎస్ఈలో 1.48 శాతం లాభంతో రూ.1,00,439.95 దగ్గర ఎంఆర్ఎఫ్ ప్రారంభమైంది. బీఎస్ఈలో రూ.1,00,300 వద్ద ట్రేడింగ్ స్టార్ట్ చేసింది.
46 శాతం పెరిగిన షేర్ వాల్యూ
ఏడాది వ్యవధిలోనే ఎంఆర్ఎఫ్ షేర్ వాల్యూ 46 శాతం పెరగడం విశేషం. మే 8న ఈ స్టాక్ స్పాట్ మార్కెట్లో రూ.99,933 వద్ద గరిష్ఠాన్ని తాకింది. మెరుగైన త్రైమాసిక, వార్షిక ఫలితాలు కలిసివచ్చి స్టాక్ ర్యాలీకి ఊపునిచ్చాయి.
రెండున్నర ఏళ్ల పట్టింది!
2021 జనవరిలో ఎంఆర్ఎఫ్ షేర్ తొలిసారి రూ.90వేలు మార్క్ను క్రాస్ చేసింది. అక్కడి నుంచి రూ.1 లక్ష మైలు రాయిని చేరేందుకు ఈ స్టాక్కు దాదాపుగా రెండున్నర ఏళ్లు పట్టింది.
షేర్లు విభజించడం లేదు!
వాస్తవానికి స్టాక్ విలువ అమాంతం పెరుగుతున్నప్పటికీ.. కంపెనీ మాత్రం షేర్లను విభజించకపోవడం విశేషం. అలాగే ఇప్పటి వరకు ఎలాంటి బోనస్ షేర్లను జారీ చేయకపోవడం గమనార్హం. సాధారణంగా షేర్ల విలువ భారీగా పెరిగినప్పుడు కంపెనీలు వాటిని విభజిస్తూ ఉంటాయి. ఫలితంగా సామాన్య రిటైల్ మదుపర్లు కూడా వాటిని కొనేందుకు వీలవుతుంది. కానీ ఎంఆర్ఎఫ్ ఆ దిశగా ఎన్నడూ అడుగులు వేయలేదు.
డివిడెండ్స్ ఇస్తోంది!
2022-23కిగాను ఎంఆర్ఎఫ్ మే 3వ తేదీన రూ.169 డివిడెండ్ను ప్రకటించింది. గత ఆర్థిక సంవత్సరంలో రూ.3 చొప్పున రెండు సార్లు మధ్యంతర డివిడెండ్లను ఇచ్చింది. మార్చితో ముగిసిన త్తైమాసికంలో ఎంఆర్ఎఫ్ లాభం దాదాపు రెండింతలు పెరిగి రూ.410.7 కోట్లుగా నమోదు అయ్యింది. ఆదాయం 10.1 శాతం పెరిగి రూ.5,725.4 కోట్లకు చేరుకుంది.
చెన్నై కేంద్రంగా పనిచేస్తున్న ఎంఆర్ఎఫ్ మొత్తంగా 42,41,143 షేర్లను జారీ చేసింది. వీటిలో 72 శాతం షేర్లు అంటే 30,60,312 షేర్లు పబ్లిక్ షేర్ హోల్డర్ల వద్ద ఉన్నాయి. వీటిలోన రిటైల్ షేర్ హోల్డర్ల వాటా కేవలం 12.73 శాతం మాత్రమే. ప్రమోటర్ల వద్ద 27.84 శాతం అంటే 11,80,831 షేర్లు ఉన్నాయి.
రిలయన్స్కు... ఫోర్బ్స్ టాప్ 45 ర్యాంక్
ప్రముఖ భారతీయ బిలియనీర్ ముకేశ్ అంబానీకి చెందిన రిలయన్స్ కంపెనీ.. ఫోర్బ్స్ గ్లోబల్ 2000 లిస్ట్లో 45 ర్యాంకును సాధించింది. గతేడాదితో పోల్చితే 8 స్థానాలు ఎగబాకిన రియలన్స్.. భారత కంపెనీలు అన్నింటి కంటే అగ్రస్థానంలో నిలిచింది.
ఫోర్బ్స్ మెట్రిక్స్: అమ్మకాలు, లాభాలు, ఆస్తులు, మార్కెట్ విలువ అనే నాలుగు సూచీలను తీసుకుని, ప్రపంచవ్యాప్తంగా ఉన్న టాప్ కంపెనీల ర్యాంకులను ఫోర్బ్స్ ప్రకటించింది. దాదాపు 55 భారతీయ సంస్థలు, బ్యాంకులు కూడా ఫోర్బ్స్ ర్యాంకింగ్లను పొందాయి. ఎస్బీఐ 77వ ర్యాంకు, హెచ్డీఎఫ్సీ బ్యాంకు 128 ర్యాంకు, ఐసీఐసీఐ బ్యాంకు 163 ర్యాంకుల్లో నిలిచాయి. కాగా గతేడాది టాప్లో ఉన్న ఆదానీ గ్రూప్ కంపెనీలు.. ఆదానీ ఎంటర్ప్రైజెస్ 1062, ఆదానీ పవర్ 1488, ఆదానీ పోర్ట్స్ & స్పెషల్ ఎకనామిక్ జోన్స్ 1598 ర్యాంకులకు పడిపోయాయి.
ఇవీ చదవండి:
